मडकी वस्ती व अक्कलकोट रोडवरील घटना! वाटेतच कपडे बदलून दुचाकीस्वाराने हिसकावले दोन महिलांच्या गळ्यातील दागिने; दुचाकीस्वार पुण्याच्या दिशेने पसार

सोलापूर : मुलीसह दुचाकीवरून निघालेल्या महिलेच्या गळ्यातील मंगळसूत्र अनोळखी दुचाकीस्वाराने लंपास केल्याची घटना ६ मे रोजी रात्री साडेनऊच्या सुमारास मडकी वस्ती परिसरात घडली आहे. दुसरीकडे शांती चौकातून अक्कलकोट रोडवरील महालक्ष्मी मंदिराकडे निघालेल्या महिलेच्या गळ्यातील तीन तोळ्याचे गंठण देखील दुचाकीस्वाराने हिसकावले आहे. दोन्ही घटनांमधील संशयित एकच आहेत, पण त्यांनी वाटेत कपडे बदलले असावेत, असा पोलिसांचा अंदाज आहे.

६ मे रोजी रात्री साडेनऊच्या सुमारास रूपाली संतोष अहिरसंग (वय ४१, रा. डांगे नगर, बाळे) या मुलीला घेऊन दुचाकीवरून घराकडे निघाल्या होत्या. अचानक त्यांच्या मागून आलेल्या दुचाकीस्वाराने त्यांचा पाठलाग केला. त्या दुचाकीस्वाराने आमच्या गाडीजवळ आल्यावर वेग कमी केला. काही समजण्यापूर्वीच त्या दुचाकीवर मागे बसलेल्या एकाने गळ्यात हात घालून ४० हजार रुपयांचे मंगळसूत्र जबरीने हिसकावले. गळ्यातून ओढलेल्या मंगळसूत्रातील अर्धा भाग एक वाटी व चार मणी चोरट्याच्या हाती लागले आणि आरडाओरड करत असतानाच ते दुचाकीस्वार पसार झाले. पोलिसांना घटनेची माहिती मिळताच फौजदार चावडी ठाण्याचे अधिकारी, अंमलदार त्याठिकाणी आले. पण, पोलिसांना त्या अनोळखी दुचाकीस्वारांचा शोध लागला नाही.

रूपाली अहिरसंग यांच्या फिर्यादीवरून फौजदार चावडी पोलिसांत गुन्हा दाखल झाला असून सहायक पोलिस निरीक्षक शंकर धायगुडे तपास करीत आहेत. दुसरीकडे दुचाकीवरून निघालेल्या महिलेचा पाठलाग करून त्यांच्याही गळ्यातील तीन तोळ्याचे गंठण दुचाकीस्वाराने लांबविल्याचा गुन्हा जेलरोड पोलिस ठाण्यात दाखल झाला आहे. सहायक पोलिस निरीक्षक नीलेश सोनवणे तपास करीत आहेत.

पोलिसांकडून ‘सीसीटीव्ही’ची पडताळणी

चेन स्नॅचिंग करणाऱ्या दुचाकीस्वारापैकी गाडी चालविणाऱ्याने तोंडाला मास्क लावला होता. मागे बसलेल्या व्यक्तीने तोंडाला काळा स्कार्प बांधलेला होता. महिलेच्या गळ्यातील मंगळसूत्र हिसकावून घेऊन ते दुचाकीस्वार तसेच पुण्याच्या दिशेने गेले आहेत. पोलिस या मार्गावरील सीसीटीव्ही फुटेज पडताळून पाहत आहेत.