साताऱ्याच्या सुपुत्राला लडाखमध्ये वीरमरण

वाई (सातारा) : वाई तालुक्यातील (Wai Taluka) आसले गावचे सुपुत्र सोमनाथ मांढरे (Soldier Somnath Mandhare) यांना लडाख (Ladakh) येथे देशसेवा करीत असताना अतिशय प्रतिकूल वातावरणाचा सामना करताना वीरमरण आले. लडाख येथे काल पहाटेपासून त्यांची नेमणूक होती. यावेळी हवामानातील बदलामुळे त्यांना श्वासोश्वास घेण्यास त्रास होऊ लागला. त्यातच ते बेशुद्ध झाले.

जवान मांढरे यांना जवळच्या लष्करी रुग्णालयात उपचारासाठी दाखल केले, परंतु उपचारादरम्यान त्यांचा मृत्यू झाला. याची माहिती सायंकाळी (ता. 18) कुटुंबीयांना कळविण्यात आली. वाईचे तहसीलदार रणजीत भोसले यांना ही माहिती मिळाली. त्यांनी आसले (ता. वाई) येथील त्यांचे बंधू महेश मांढरे यांना याबाबतची माहिती कळवली.

सोमनाथ मांढरे यांना वीरमरण आल्याने सर्वत्र हळहळ व्यक्त होत आहे. त्यांच्या मागे त्यांची पत्नी, आठ वर्षांचा मुलगा, अवघ्या दहा महिन्यांची मुलगी व लहान भाऊ असा परिवार आहे. हुतात्मा जवान सोमनाथ मांढरे यांचे पार्थिव आज (ता. 19) पहाटे दिल्लीत पोहोचेल. तद्नंतर सायंकाळपर्यंत आसले या मूळ गावी पोहोचेल व त्यांच्यावर शासकीय इतमामात आसलेत अंत्यसंस्कार करण्यात येणार आहेत.