State Cooperative Bank : राज्य सहकारी बँकेस सुरक्षेचे 'आयएसओ' प्रमाणपत्र

पुणे - महाराष्ट्र राज्य सहकारी बँकेस आयएसओ प्रमाणपत्र प्राप्त झाले आहे. आंतरराष्ट्रीय मानांकन संस्थेने (आयएसओ) मार्च २०२३ मध्ये ऑडिट करुन बॅंकेस दिलेले हे प्रमाणपत्र पुढील तीन वर्षांकरिता वैध असून, या कालावधीत संस्थेतर्फे नियमित परिक्षण होणार आहे, अशी माहिती राज्य बँकेचे प्रशासक विद्याधर अनास्कर यांनी दिली.

अनास्कर म्हणाले, कोणत्याही संस्थेस विशेषत आर्थिक संस्थेस 'आंतरराष्ट्रीय सुरक्षा मानक' प्राप्त होणे ही अभिमानाची बाब असते. ११२ वर्षांचा दैदिप्यमान इतिहासाचा वारसा जपत आधुनिकतेशी सांगड घालत राज्य बँकेने इतिहासात प्रथमच मिळविलेले आयएसओ 27001-2013 हे आंतरराष्ट्रीय सुरक्षेचे मानक, बँकेच्या प्रगतीचे द्योतक आहे.

आधुनिक तंत्रज्ञानाच्या युगात ग्राहकांच्या माहितीची सुरक्षा अतिमहत्वाची मानून बँकेने स्वतःच्या संगणक प्रणालीचे पायाभूत मजबुतीकरण केले आहे. याच व्यवस्थेच्या उत्कृष्ट उभारणीसाठी बँकेने आंतरराष्ट्रीय संस्थेकडून प्रमाणपत्र प्राप्त केल्याने ग्राहकांना त्यांच्या व्यवहारांच्या सुरक्षेची हमी मिळाली, असेच म्हणावे लागेल. संगणक प्रणालीचे मुलभूत व महत्वाचे कार्य हे ग्राहकांच्या माहितीची सुरक्षा, गोपनीयता व अखंड उपलब्धता या त्रिसुत्रीवर अवलंबून असते.

सध्या होत असलेले सायबर हल्ले पाहता भविष्यातील सुरक्षिततेच्या दृष्टीने बॅंकेने आपल्या संगणक विभागात अत्युच्च दर्जाची यंत्रणा उभी करत स्वतंत्रपणे वाशी, नवी मुंबई येथे सायबर सिक्युरिटी ऑपरेशन सेंटर उभारणीचे काम हाती घेतले आहे. याचा फायदा भविष्यात सर्व सहकारी बँकांना उपलब्ध करुन देण्याचा बँकेचा मानस आहे. याबाबत राज्य बँकेची सर्व धोरणे आणि कार्यप्रणाली आयएसओ मानांकनानुसार निश्चित करण्यात आली आहेत. ती अधिक सुरक्षित व कार्यक्षम झालेली आहेत.