बोनस नाहीच! ऑक्टोबरचा पगार दिवाळीपूर्वीच मिळणार; राज्य सरकारचा निर्णय

नवी दिल्ली : दिवाळीच्या पार्श्वभूमीवर राज्य शासनानं महत्वाचा निर्णय घेतला आहे. त्यानुसार, यंदा बोनस जाहीर झालेला नाही मात्र, ऑक्टोबर महिन्याचं वेतन आणि निवृत्तीवेतन दिवाळीपूर्वीच देण्याचा निर्णय सरकारकडून घेण्यात आला आहे. याद्वारे राज्य शासकीय अधिकारी-कर्मचाऱ्यांच्या विविध संघटनांनी केलेल्या मागणीची मुख्यमंत्री यांनी घेतली. (Maha govt takes decision about advance salary of October month before Diwali Festival)

दिवाळी सणाची सुरुवात यावर्षी २२ ऑक्टोबर २०२२ पासून होत आहे. राज्य शासकीय कर्मचारी तसेच निवृत्तीवेतनधारकांना दिवाळी साजरी करताना आर्थिक अडचणींचा सामना करावा लागू नये यासाठी ऑक्टोबरचा पगार दिवाळीपूर्वी देण्याचा शासनाचा विचार होता. त्यानुसार, हा पगार २१ ऑक्टोबरपूर्वी देण्याचे आदेश देण्यात आले आहेत. जिल्हा परिषद, मान्यताप्राप्त व अनुदान प्राप्त शैक्षणिक संस्था, कृषी संचालक, लेखा व कोषागारे, महाराष्ट्र राज्य, मुंबई यांनी अधिदान व लेखा कार्यालय तसेच राज्यातील सर्व कोषागारे व उपकोषागारे यांना आवश्यक त्या सूचना तात्काळ निर्गमित कराव्यात, असं शासनानं आपल्या आदेशात म्हटलं.

यासाठी वेतन देयकं होण्यासाठी सर्व पूर्तता केलेली वेतन देयकं त्वरीत कोषागारात सादर करण्याच्या सूचनाही देण्यात आल्या आहेत. हे आदेश विद्यापीठे, अकृषी विद्यापीठे व त्यांच्या संलग्न अशासकीय महाविद्यालयांचे अधिकारी, कर्मचारी तसेच निवृतवेतनधारक यांना देखील लागू असणार आहेत.