Maratha Reservation: आरक्षणाचं पत्र हातात पडेपर्यंत आंदोलन थांबणार नाही; जरांगे पाटील भूमिकेवर ठाम

जालना- सर्वपक्षाच्या बैठकीतील ठरावाची प्रत मनोज जरांगे पाटील यांना अर्जून खोतकर यांनी दिली आहे. गेल्या १५ दिवसांपासून जरांगे पाटील उपोषणाला बसले आहेत. ते आज काय निर्णय घेतीय याकडे सगळ्यांचं लक्ष होतं. आरक्षणाचं पत्र सर्वसामान्य मराठ्याच्या हातात पडेपर्यंत आंदोलन थांबणार नाही, अशी भूमिका जरांगे पाटील यांनी मांडलीये.

तुम्हाला विचारल्याशिवाय मी कोणतंही पाऊल उचलणार नाही. मी तुमच्यापुढे जाणार नाही. मी तुमच्यासाठी जीवाची बाजी लावणार आहे. सर्वपक्षीय नेत्यांनी एकत्र येत पहिल्यांदाच बैठक घेतली. सर्व पक्षांनी मराठा समाजाला आरक्षण देण्याचा ठराव एकमताने मंजूर केला आहे. ठरावाची प्रत मला देण्यात आली आहे. मी पारदर्शकपणे काम करतो, असं जरांगे पाटील म्हणाले.

सरकारला ४० वर्षे आपण दिली आहेत. सरकारने एका दिवसात जीआर काढला आहे, पण ते न्यायालयात टिकणार नाही. महिन्याचा वेळ दिला तर न्यायलयात टिकणारं आरक्षण देणार का? अशी विचारणा त्यांनी सरकारकडे केली. तुम्ही म्हणाल ते करायला तयार आहे, पण गैरसमज नको. मी सध्या द्विधा मनस्थितीत आहे. मला त्यांनी एक महिन्याचा वेळ मागितलाय, असं जरांगे पाटील म्हणाले.

एक महिन्यानंतर सर्व मराठ्यांना कुणबी प्रमाणपत्र दिले जाईपर्यंत मी घरी जाणार नाही. समितीचा अहवाल एका महिन्याने काहीही येवो, पण सर्व मराठ्यांना प्रमाणपत्र द्यायलाच हवं. सरकारला ४० वर्षे दिले आहेत, त्यामुळे आणखी एक महिना द्यायला काही हरकत नाही असं मला वाटतं. पण, तोपर्यंत आंदोलन सुरुच राहील, असं ते म्हणाले.

आपण एकत्र असल्याने सरकार आपल्यासमोर झुकलं. तुमच्याशी चर्चा करुनच निर्णय घेईन, असा विश्वास जरांगे पाटील यांनी दिला. मंत्री उदय सामंत हे विशेष विमानाने उपोषण स्थळी आले आहेत. मुख्यमंत्री एकनाथ शिंदे यांचा संदेत घेऊन ते जरांगे पाटलांची भेट घेत आहेत. (Latest Marathi News)

निजामकालीन नोंदीमध्ये मराठा कुणबी किंवा कुणबी मराठा अशी नोंद असलेल्या मराठ्यांना कुणबी प्रमाणापत्र देण्यासाठी राज्य सरकारने जीआर काढला आहे. तसेच ही सर्व प्रक्रिया सुरळीत व्हाही यासाठी माजी न्यायमूर्ती संदीप शिंदे यांच्या नेतृत्त्वात समितीची स्थापना करण्यात आली आहे.