मराठी भाषा दिन विशेष: ऑनलाईन नोंदीमुळे मराठी विश्वकोशाच्या खंडांची संख्या वाढणार

मुंबई : मराठी विश्वकोश मंडळाच्या (Marathi Vishwakosh) २१ खंडांच्या द्वितीय सुधारित आवृत्तीत मंडळाच्या संकेतस्थळावर असलेल्या शेकडो नोंदींचा समावेश केला जाणार आहे. त्यामुळे या खंडांची संख्याही मोठ्या प्रमाणात वाढणार आहे. शिवाय वाचकांना (Readers) मोठ्या प्रमाणात ज्ञानवृद्धीसाठी (Knowledge expansion) मोठी मदत मिळणार आहे. जगभरातील विविध विषयांचे ज्ञान आणि त्याचा प्रसार मराठी भाषेतून (Marathi Language) करण्याचा वसा उचललेल्या मराठी विश्वकोश मंडळाने सर्व २१ खंडांची द्वितीय सुधारित आवृत्ती काढण्याचे काम हाती घेतले आहे.

यासाठी त्रिसूत्री धोरण अवलंबले जात आहे. यात छापील खंडांतील अनेक त्रुटी, चुका आणि वादग्रस्त शब्द वगळून ते अद्ययावत केले जात आहेत. यासाठी प्रत्येक खंडातील नोंदीत अचूकता तसेच त्या अद्ययावत करण्याचे आणि त्यातील वादग्रस्त नोंदींमध्ये सुधारणा करण्याचे काम सुरू असल्याची माहिती मंडळाचे अध्यक्ष डॉ. राजा दीक्षित यांनी दिली. मराठी भाषेला अभिजात दर्जा मिळावा यासाठी विश्वकोश मंडळाने मागील काही दिवसांपूर्वीच भाषा पंधरवडा साजरा करण्यात आला. या कालावधीत ४६ ठिकाणी कार्यक्रम घेण्यात आले. त्यासाठी अभिजात दर्जा या विषयावर लघुपटही दाखवण्यात आला. मंडळाकडून भाषावृद्धी आणि समृद्धी यासाठी कायमच हातभार लावला जातो. प्रमाण भाषेची निर्मिती करण्यासाठी सहभाग असतो, असेही डॉ. दीक्षित यांनी सांगितले.

कुमारकोषाचे दोन खंड पूर्ण झाले आहे. उर्वरित दोन खंडही पुढील वर्षी प्रकाशित करण्याची तयारी मंडळाने केली आहे. हे दोन्ही खंड पुस्तक रूपाने आणि संकेतस्थळावरही उपलब्ध केले जाणार आहेत; तर दुसरीकडे बालकोशाच्या कामाचेही नियोजन सुरू असल्याचे डॉ. दीक्षित यांनी सांगितले.

संकेतस्थळावर ५,१५३ नोंदी

मंडळाच्या २१ छापील खंडांत १८,२४४ नोंदी आहेत; तर मंडळाच्या संकेतस्थळावर ५,१५३ नोंदी आहेत. या सर्व नोंदी द्वितीय आवृतीत नोंदवल्या जाणार आहेत. त्यामुळे २१ खंडांची संख्या ३० खंडांपर्यंत पोहोचण्याची शक्यता आहे.