'लोकसभेत तुमचा का पराभव झाला अन् मी का निवडून आलो'

सातारा : साताऱ्यात दोन्ही राजेंमध्ये चांगलीच जुंपलीय. एकमेकांवर आरोप-प्रत्यारोपाच्या फैरी झडत आहेत. खासदार उदयनराजेंनी (Udayanraje Bhosale) माझ्याबद्दल मी छत्रपतींचा (Chhatrapati Shivaji Maharaj) विचाराचा आहे का, हे ठरवण्याचा अधिकार त्यांना कोणी दिलाय. उदयनराजे थोर विचारवंत आहेत, इतिहासकार आहेत का? उदयनराजे जर छत्रपतींच्या विचाराने चालणारे आहेत तर लोकसभेला (Loksabha Election) तुमचा पराभव का झाला आणि त्याच विधानसभेच्या निवडणुकीत (Assembly Election) मी निवडून का आलो याचं उत्तर उदयनराजेंनी द्यावं, असं थेट आव्हान आमदार शिवेंद्रसिंहराजे भोसले (Shivendrasinharaje Bhosale) यांनी उदयनराजेंना दिलंय.

सध्या खासदार उदयनराजे आणि आमदार शिवेंद्रसिंहराजे यांच्यात शाब्दिक युध्द पहायला मिळत आहे. विविध कारणावरुन दोन्ही राजे एकमेकांवर आरोप-प्रत्यारोप करताना दिसत आहेत. खासदार उदयनराजेंनी जावळी तालुक्यातील (Jawali Taluka) एका कार्यक्रमात आमदार शिवेंद्रराजेंचं नाव न घेता त्यांच्यावर कारखान्यातील भ्रष्टाचाराबाबत गंभीर आरोप करताना आणि छत्रपती घराण्याचा वारसा सांगताना छ. शिवाजी महाराजांचं आचार-विचार आचरणात आणून जोपासलं पाहिजेत, अशी अपेक्षा त्यांनी व्यक्त केली होती आणि शिवेंद्रराजेंवर निशाणा साधला होता.

उदयनराजेंच्या याच विधानाला आमदार शिवेंद्रसिंहराजेंनी जोरदार प्रत्युत्तर दिलंय. ते उदयनराजेंना उद्देशून म्हणाले, रात्री-अपरात्री उशिरा गाड्या फिरवायच्या. गाडीमध्ये मोठ्या आवाजात गाणी लावून गावातून फिरायचं, हे उदयनराजेंच्या दृष्टीनं छत्रपतींचे विचार आहेत का? आपण जसं यात्रेमध्ये डोंबाऱ्याचा खेळ बघतो, तसा उदयनराजे यांच्या वाढदिवसाला (Udayanraje Birthday) देखील एक डोंबाऱ्याचा खेळ आपण बघितलाय, असा घणाघातही शिवेंद्रराजेंनी उदयनराजेंचं नाव न घेता केलाय.