शिवाजी महाराजांवरील भाजप प्रवक्त्याच्या विधानाने MP कोल्हे संतापले; म्हणाले दळभद्री...

मुंबई - भाजपच्या प्रवक्त्याने केलेल्या वादग्रस्त विधानामुळे राज्याचं राजकारण तापलं असून विविधी स्तरातून भाजपच्या विधानाचा निषेध नोंदवण्यात येत आहे. त्यातच राष्ट्रवादी काँग्रेसचे खासदार डॉ. अमोल कोल्हे यांनी यावर प्रतिक्रिया दिली आहे. तसेच संताप व्यक्त केली आहे. (Dr. Amol Kolhe news in Marathi)

अमोल कोल्हे यांनी फेसबुक पोस्ट करून म्हटलं की, डॉ. सुधांशू त्रिवेदीजी, छत्रपती शिवाजी महाराजांनी अठरापगड जातीच्या मावळ्यांच्या मदतीने औरंग्याला फरफट करून या महाराष्ट्रात गाडलं. हाच खरा इतिहास आहे. तुमच्या दळभद्री वक्तव्याचा जाहीर निषेध! छत्रपती शिवराय आमची अस्मिता आहे, तिला कोणीही डिवचू नये, अशा शब्दात कोल्हे यांनी भाजपला खडसावलं.

भाजपचे प्रवक्ते सुधांशू त्रिवेदी यांनी एका वृत्त वाहिनीच्या मुलाखतीत छत्रपती शिवाजी महाराजांबाबत वादग्रस्त विधान केले आहे. त्यांच्या या वक्तव्याचा व्हिडीओ सध्या सोशल मीडियावर चांगलाच व्हायरल होत आहे. "शिवाजी महाराजांनी ५ वेळा औरंगजेबाची पत्र लिहून माफी मागितली होती असं वादग्रस्त विधान त्रिवेदी यांनी केलं आहे.