मुंबईला बॉम्बने उडवण्याची धमकी; उपमुख्यमंत्री म्हणाले...

मुंबई : मुंबई पोलिस ट्राफिक कंट्रोल रुमला धमकीचे मेसेज आल्यामुळे खळबळ माजली होती. त्यानंतर मुंबई पोलिसांनी या धमकीची दखल घेत अलर्ट जारी केली आहे. त्यानंतर आता याप्रकरणी गुन्हा दाखल करण्यात आला असून या मेसेजचा तपास सुरू करत असल्याचं राज्याचे उपमुख्यमंत्री देवेंद्र फडणवीस यांनी सांगितलं आहे.

दरम्यान, २६/११ सारखा भयानक हल्ला पुन्हा एकदा करणार असल्याची धमकी मुंबई पोलिसांना देण्यात आली होती. कंट्रोल रुमच्या नंबरवर पाकिस्तानमधून हे धमकीचे मेसेजेस आले होते. त्यानंतर आता या मेसेजची दखल घेण्यात आली असून मुंबईचे पोलिस हायअलर्ट वर आहेत.

"हे प्रकरण खूप गंभीर असून मुंबईत पुन्हा २६/११ घडवण्याची धमकी देण्याऱ्या नंबरचा तपास सध्या सुरू आहे. हे मेसेज कुणी आणि कसे पाठवले याची चौकशी सुरू आहे. यानंतर सर्व तपास यंत्रणा सतर्क झाल्या असून मुंबईचे पोलिस आयुक्त अधिकची माहिती देणार आहेत." असं देवेंद्र फडणवीस म्हणाले आहेत