Jaipur-Mumbai Exp Firing: "फक्त मोदी अन् योगीच..", एक्सप्रेसमध्ये गोळीबार केल्यावर कॉन्स्टेबलने घेतले ठाकरेंचेही नाव, Video Viral

जयपूर-मुंबई एक्सप्रेसमध्ये आज (सोमवारी) पहाटे ५ च्या सुमारास झालेल्या गोळीबारात 4 जणांचा मृत्यू झाला आहे. पोलिस कॉन्स्टेबल चेतन सिंह याने या चौघांना गोळ्या घातल्या. आता या घटनेचा एक व्हिडिओ सोशल मीडियावर मोठ्या प्रमाणावर व्हायरल झाला आहे. या व्हिडिओमध्ये गोळ्या झाडणारा चेतन सिंह हातात बंदूक घेऊन प्रवाशांना धमकावताना दिसत आहे. त्याच्या पायाजवळ एका प्रवाशाचा मृतदेहही पडल्याचं व्हिडिओमध्ये दिसून येत आहे.

व्हिडिओमध्ये काय आहे?

जयपूरहून मुंबईच्या दिशेने जाणाऱ्या एक्सप्रेसच्या ३ बोगींमध्ये गोळीबाराची घटना घडली. यात आरोपी चेतन सिंहने एएसआय टिकाराम मीना आणि इतर 3 प्रवाशांना गोळ्या घालून ठार केलं आहे. या घटनेनंतर चेतन सिंहने बोगीतील इतर प्रवाशांना धमकावल्याचं या व्हिडिओमध्ये दिसून येत आहे. त्यापैकी एका प्रवाशाने या घटनेचा व्हिडिओ तयार केला आहे. यामध्ये आरोपी चेतन विरुद्ध दिशेला तोंड करून उभा असल्याचं दिसून येत आहे. त्याच्या हातात बंदूक आहे.

व्हिडिओमध्ये आरोपी चेतनने मोदी अन् योगींचे घेतलं नाव

व्हिडिओमध्ये चेतन सिंह बोलताना दिसत आहे. हे लोक पाकिस्तानमधून ऑपरेट झाले होते. म्हणून त्यांना मारल्याचं तो सांगतो. आपली माध्यमेही हेच सांगतील. भारतात रहायचं असेल, तर केवळ मोदी आणि योगीच..., आणि तुमचे ठाकरे असेही चेतन सिंह या व्हिडिओत म्हणताना दिसून येत आहे. त्यामधील त्याचे काही शब्द निटसे ऐकू येत नाहीत.