मराठा समाजाचे अनेक मुख्यमंत्री झाले, पण आतापर्यंत आरक्षण मिळालं नाही; भाजप आमदारानं व्यक्त केली खंत

नागपूर : विधानसभेच्या हिवाळी अधिवेशनात (Nagpur Winter Session) गेल्या तीन-चार दिवसांपासून मराठा आरक्षण विधेयकावर चर्चा सुरू आहे. या मुद्द्यावरून अनेक आमदारांनी सरकारला टोले लगावले आहेत. माण-खटावचे भाजपचे आमदार जयकुमार गोरे (Jaykumar Gore) यांनी मात्र आक्रमकपणे मुद्दे मांडत आजपर्यंत मराठा समाजाचे अनेक मुख्यमंत्री झाले; पण आरक्षण मिळालं नाही, ही खंत या समाजाला आहे, असे त्यांनी नमूद केले.

पृथ्वीराज चव्हाण (Prithviraj Chavan) पंतप्रधान कार्यालयाचे मंत्री असताना आरक्षण का मिळाले नाही? असा हल्लाबोल त्यांनी यावेळी केला. गोरे म्हणाले, ‘‘मराठा समाजाला आरक्षण मिळाले पाहिजे, ही आपल्या सर्वांची इच्छा आहे; पण ओबीसी आरक्षणाला धक्का न लागता मराठा समाजाला आरक्षण मिळाले पाहिजे, ही आमची भूमिका कायम आहे.

समाज जरांगे-पाटलांवर विश्वास ठेवतो; पण आठ- आठ टर्म आमदार राहिलेल्या आमदारांवर समाजाचा विश्वास राहिलेला नाही, याला आपणच जबाबदार आहोत. समाज गावात येऊ देत नाही, याचा विचार सर्वांनी करावा.’’

मराठा समाजाचे मुख्यमंत्री या महाराष्ट्रात होऊन गेले; पण आरक्षण मिळाले नाही, ही खंत मराठा समाजाला असून, पृथ्वीराज चव्हाण पंतप्रधान कार्यालयाचे मंत्री असताना आरक्षण का मिळाले नाही? असा सवालही त्यांनी सभागृहात केला.