APMC Election 2023: प्रतिष्ठेच्या लढाईत विखे पाटीलांना मोठा धक्का; राहुरी बाजार समितीत पुन्हा तनपुरेंची सत्ता

राज्यातील 147 कृषी उत्पन्न बाजार समितींसाठी शुक्रवारी मतदान पार पडलं. यापैकी 37 बाजार समित्यांची मतमोजणी शुक्रवारीच पार पडली. यापैकी काही बाजार समित्यांचे निकाल आज (शनिवारी) जाहीर होणार आहेत.

अहमदनगर जिल्ह्यातील प्रतिष्ठेच्या राहुरी कृषी उत्पन्ना बाजार समितीचा निकाल जाहीर झाला. या निवडणुकीत राष्ट्रवादी काँग्रेसचे आमदार प्राजक्त तनपुरे, भाजप खासदार सुजय विखे पाटील, माजी आमदार शिवाजी कर्डीले आणि यांची प्रतिष्ठापणाला लागली होती.

अखेर या निवडणुकीत प्राजक्त तनपुरे यांच्या पॅनेलने भाजप पुरस्कृत पॅनेलचा धुव्वा उडवत भाजपला चांगलाच धोबीपछाड दिला आहे.

त्यामुळे राहुरी बाजार समितीत पुन्हा तनपूरेंचीच सत्ता आली आहे. या निवडणुकीत तनपुरे गटाचा दणदणीत विजय झालाय. तनपुरे गटाने 18 पैकी तब्बल 16 जागा जिंकत दणदणीत विजय मिळवत राहुरी बाजार समितीवर 20 वर्षांपासूनची एकहाती सत्ता कायम ठेवली आहे.

या निवडणुकीत विखे-कर्डिले गटातील सोसायटी मतदारसंघातून दोन सदस्य निवडून आले आहेत. या निवडणुकीत विखे पाटलांनी तनपुरेंना आव्हान दिलं होतं. मात्र नवख्या प्राजक्त तनपुरे यांनी विखे-कर्डिले गटाचा करेक्ट कार्यक्रम केला आहे.