"हिंदुंवर हल्ले होतात"; राणेंच्या वक्तव्यावर रोहित पवारांचे प्रत्युत्तर

अहमदनगर : नुपूर शर्मा यांच्या वक्तव्याचे समर्थन केल्यामुळे अहमदनगर येथे एका तरूणाला मारहाण केल्याचा प्रकार समोर आल्याचा दावा भाजप आमदार नितेश राणे यांनी केला आहे. उदयपूर, अमरावतीनंतर आता अहमदनगर येथे हिंदुंवर हल्ला झाल्याचं राणे यांनी सांगितलं आहे. त्यानंतर राष्ट्रवादीचे आमदार रोहित पवार यांनी फेसबुक पोस्ट करत "आमच्या भूमीत धार्मिक द्वेषाच्या घटना कधी घडल्या नाहीत व पुढंही घडणार नाहीत" असं सांगितलं आहे.

(Rohit Pawar On Nitesh Rane)

दरम्यान, आमदार नितेश राणे यांनी पत्रकार परिषद घेऊन हिंदूंवर आत्याचार होत असून हे काय महाविकास आघाडी सरकार नाही किंवा येथे अल्पसंख्यांक मंत्री नवाब मलिकही नाहीत. त्यामुळे आता हल्ले झाले तर आम्हीही जशास तसे उत्तर देऊ असं त्यांनी सांगितलं होतं. त्यानंतर राणेंच्या आरोपाला रोहित पवार यांनी पोस्ट करत चोख प्रत्युत्तर दिलं आहे.

रोहित पवारांची पोस्ट

सद्गुरू संतश्री गोदड महाराजांच्या कर्जतच्या भूमीत धार्मिक द्वेषाच्या घटना कधी घडल्या नाहीत व पुढंही घडणार नाहीत. कारण संतशिकवणीनुसार वागणारी माणसं इथं आहेत. त्यामुळं या भूमीबाबत प्रत्येकाने योग्य माहिती घेऊनच बोलावं. आमच्या भागातील सामाजिक सलोखा भंग करण्याचा प्रयत्न कोणीही करू नये.

भंडाऱ्यात अत्याचार झालेली महिला आज मृत्यूशी झुंज देतेय, परंतु याबाबत आवाज उठवायला 'आमचं हिंदुत्व' कधी जागृत होत नाही. पूरग्रस्तांच्या मदतीसाठी 'आमचा' तिसरा डोळा कधी उघडत नाही. पण राजकीय पोळ्या शेकण्यासाठी मात्र आमचं हिंदुत्व जागृत होतं, हीच खरी शोकांतिका आहे.

असं ट्वीट करत रोहित पवारांनी नितेश राणे यांच्या टीकेला चोख प्रत्युत्तर दिले आहे.