Sakal Sanman Sohala 2025 : साम टीव्हीवर उद्या रंगणार ‘सकाळ सन्मान’ सोहळा

मुंबई - मायमराठीला मिळालेल्या अभिजात भाषेच्या गौरवार्थ आणि ‘सकाळ’च्या ५४ व्या वर्धापनदिनाचे औचित्य साधत ‘अभिजात मराठी, अभिमान मराठी’ अभियानांतर्गत ‘सकाळ सन्मान’ सोहळा नुकताच मोठ्या दिमाखात पार पडला.

मराठी भाषेचा प्रसार, प्रचार आणि संवर्धन करणाऱ्यांसह सामाजिक, सांस्कृतिक, शैक्षणिक, वैद्यकीय, उद्योग, मनोरंजन, प्रशासकीय आदी क्षेत्रांत उल्लेखनीय कर्तृत्वव्रतींचा या वेळी गौरव करण्यात आला. हा रंगारंग सोहळा येत्या रविवारी (ता. ३०) म्हणजेच गुढीपाडव्याच्या दिवशी रात्री साडेआठ वाजता साम टीव्हीवर पाहता येणार आहे.

केवळ भाषा म्हणूनच नव्हे; तर साहित्य, संस्कृती आणि परंपरेचादेखील समृद्ध वारसा लाभलेल्या मायमराठीला मिळालेला अभिजात भाषेचा दर्जा मराठीजनांसाठी अभिमानाचा क्षण आहे. या पार्श्वभूमीवर, मायमराठीची सेवा करणाऱ्या, तिचा प्रचार-प्रसार करणाऱ्या, तिला जनमानसात रुजवणाऱ्या आणि अभिजात दर्जा मिळण्यासाठी लढणाऱ्या मान्यवरांचा यथोचित सन्मान करण्यासाठी ‘सकाळ’ने पुढाकार घेतला.

मुख्यमंत्री देवेंद्र फडणवीस, सांस्कृतिक कार्य मंत्री आशीष शेलार, कौशल्य विकास मंत्री मंगलप्रभात लोढा, विधान परिषद उपसभापती नीलम गोऱ्हे, अभिनेते बोमन इराणी, कार्तिक आर्यन, अभिनेत्री तमन्ना भाटिया यांच्यासह सामाजिक, राजकीय तसेच सांस्कृतिक क्षेत्रातील मान्यवरांच्या उपस्थितीत झालेल्या या सोहळ्यात मायमराठीसह विविध सेवाव्रतींचा सन्मानपू्र्वक गौरव करण्यात आला.

नाट्य व चित्रपटसृष्टीतील आघाडीच्या कलाकारांच्या सहभागामुळे उत्तरोत्तर रंगत गेलेल्या या सोहळ्याचे साक्षीदार होण्यासाठी गुढीपाडव्याला रात्री साडेआठ वाजता साम टीव्ही पाहायला विसरू नका.

अनोखे नृत्याविष्कार

‘सकाळ सन्मान’ सोहळ्यात अभिनेत्री वैदेही परशुरामी, प्रियदर्शिनी इंदलकर, शुभंकर तावडे, नृत्यदिग्दर्शक आशीष पाटील यांनी आपल्या नृत्याविष्काराने चारचांद लावले. याशिवाय लोकशाहीर रामानंद उगले यांनी आपल्या दमदार आवाजात सादर केलेली छक्कड तसेच मराठी स्टँडअप कॉमेडियन अनिश गोरेगावकरच्या सादरीकरणाने कार्यक्रमाला वेगळीच रंगत आणली.

• कधी : रविवारी, ३० मार्च २०२५

• केव्हा : रात्री ८.३० वाजता

• कुठे : साम टीव्हीवर