Shiv Jayanti 2023 : आग्र्याच्या लाल किल्ल्यात शिवजयंती साजरी करण्याचा मार्ग मोकळा

आग्र्याच्या लाल किल्ला परिसरामध्ये शिवजयंती साजरी करण्यास परवानगी नाकारण्यात आल्यावरुन चांगलाच वाद निर्माण झाला होता. मात्र आता लाल किल्ला परिसरात शिवजयंती साजरी करण्याचा मार्ग मोकळा झाला आहे. महाराष्ट्र सरकारने याविषयी पुरातत्व खात्याला पत्र दिलं आहे.

आग्र्याच्या लाल किल्ला परिसरात शिवजयंती साजरी करण्यास पुरातत्व विभागाने आक्षेप घेतला होता. त्यानंतर संतापलेल्या शिवप्रेमींनी दिल्ली हायकोर्टात धाव घेतली होती. मात्र आता महाराष्ट्र सरकार सह आयोजक होण्यास तयार आहे. त्यामुळे लाल किल्ल्यावर शिवजयंतीचा मार्ग मोकळा झाला आहे.

याबद्दल महाराष्ट्र सरकारने पुरातत्व खात्याला पत्र लिहिलं आहे. हायकोर्टाने घालून दिलेल्या अटींप्रमाणे आपण या शिवजयंती कार्यक्रमाचे सहआयोजक होण्यास तयार आहोत, असं महाराष्ट्र सरकारने म्हटलं आहे. आर आर पाटील फाऊंडेशनचे विनोद पाटील यांनी या विरोधात हायकोर्टात धाव घेतली होती.

आग्र्यामध्ये छत्रपती शिवरायांना औरंगजेबाकडून कैद कऱण्यात आलं होतं आणि त्यातून महाराजांची सुटका कऱण्याची ऐतिहासिक घटनाही घडली होती. याच घटनेला उजाळा देण्यासाठी आग्र्यात शिवजयंती साजरी करण्याचं शिवप्रेमींनी ठरवलं होतं. त्याबद्दल मुख्यमंत्री एकनाथ शिंदेंनी पत्रही दिलं होतं. पण तरीही पुरातत्व विभागाने परवानगी दिली नव्हतं.