सोलापूर शहरातील प्रकार! पोलिस असल्याचे सांगून मॉर्निंग वॉकला गेलेल्या ७८ वर्षीय वृद्धाचे दागिने लंपास; डोक्यावर हेल्मेट, नंबरप्लेट नसलेल्या दुचाकीवरून दोघे पसार

तात्या लांडगे

सोलापूर : सकाळी उठून घराजवळच मॉर्निंग वॉकसाठी गेलेल्या ७८ वर्षीय ज्येष्ठाचे दागिने दोन अनोळखी तरुणांनी लंपास केले आहेत. पोलिस असल्याचे सांगून त्यांच्याकडील ५० हजार रुपयांची सोन्याची चेन व २५ हजार रुपयांची अंगठी, असे ७५ हजार रुपयांचे दागिने लंपास केले आहेत. या प्रकरणी एमआयडीसी पोलिसांत गुन्हा दाखल झाला आहे.

२२ ऑगस्ट रोजी सकाळी साडेआठच्या सुमारास अशोक भुजबळ सुमंत (वय ७८, रा. बालाजी हाउसिंग सोसायटी, कुमठा नाका, सोलापूर) हे मॉर्निंग वॉकला गेले होते. त्यावेळी एक अनोळखी त्यांच्याजवळ आला. पोलिस असल्याचे सांगून जवळील ओळखपत्र त्यांना दाखविले. ‘आम्ही कोणालाही चेक करू शकतो’ असे म्हणून त्या तोतया पोलिसाने गळ्यातील सोन्याची चेन व हातातील अंगठी काढून रुमालात ठेवायला सांगितले.

रुमालास गाठ मारून खिशात ठेवायला सांगितले. घरी गेल्यावर रुमालाची गाठ सोडा म्हणून घरी पाठविले. पण, घरी येऊन पाहिल्यावर रुमालात ना सोन्याची चेन ना अंगठी होती, असे फिर्यादी अशोक सुमंत यांनी पोलिसांना सांगितले. पोलिस हवालदार उबाळे तपास करीत आहेत.

पहिल्यांदा आपल्या साथीदाराला तपासले अन्‌...

दुचाकीवरून हेल्मेट घालून आलेल्या दौघांपैकी एकजण अगोदर फिर्यादीजवळ आला. दुसऱ्या व्यक्तीने पोलिस असल्याचे सांगून त्याच्याच साथीदाराला दागिने काढून रुमालात ठेवायला सांगितले व तेथून पाठवून दिले. त्यामुळे समोरील व्यक्तीचा विश्वास संपादन होईल म्हणून त्याने ही चलाखी केली. पुढे अशोक सुमंत यांचे दागिने घेऊन दोघेही नंबरप्लेट नसलेल्या दुचाकीवरून निघून गेले. संशयित आरोपी सोलापूर शहरातील नसल्याचा पोलिसांना संशय असून ते कोणत्या दिशेने गेले याचा शोध घेण्यासाठी पोलिस परिसरातील सीसीटीव्हींची पडताळणी करीत आहेत.