एसटी प्रवाशांचा खिसा होणार खाली, लवकरच होणार दरवाढ

नागपूर : आर्थिक संकटात असलेल्या एसटी महामंडळाचे (ST corporation) आर्थिक चाक तोट्याच्या गर्तेत खोल रुतले आहे. त्यात डिझेल, टायर, सुट्या भागांच्या किमती वाढल्याने अडचणींमध्ये भर पडली आहे. परिस्थितीतून मार्ग काढण्यासाठी महामंडळाने भाडेवाढीचा (ST ticket rate) प्रस्ताव सादर केला आहे. १०० किलोमीटरपर्यंत २५ रुपयांची दरवाढ अपेक्षित असून प्रवाशांचा खिसा खाली होणार आहे.

पहिल्या आणि दुसऱ्या लॉकडाउनमध्ये एसटी सेवेला ब्रेक लागला. लॉकडाउन शिथिल झाल्यानंतरही पुरेसे प्रवासी नसल्याने रोज कोट्यवधींचा तोटा सहन करावा लागत आहे. अशात एसटीचा संचित तोटा सात हजार कोटीच्याही वर पोहोचला आहे. संकटातून सावरण्यासाठी भाडेवाढीशिवाय दुसरा पर्याय नाही. यामुळे एसटीने १८ टक्के दरवाढीचा प्रस्ताव सादर केला आहे. त्यावर निर्णयासाठी राज्याच्या अप्पर मुख्य सचिवांच्या अध्यक्षतेखालील परिवहन समितीकडून अभ्यास करण्यात येत आहे. लवकरच समितीचा अहवाल सादर होण्याचे संकेत मिळत आहेत. एसटी महामंडळाने यापूर्वी जून २०१८ मध्ये भाडेवाढ केली होती. त्यानंतर डिझेलचे दर सातत्याने वाढत आहेत. टायरसह वारंवार लागणाऱ्या सुट्या भागांच्या किमतीही चांगल्याच वाढल्या आहेत. यामुळे भाडेवाढ अनिवार्य असल्याचे प्रशासनाकडून सांगितले जाते. दरवाढीबाबत प्रवाशांमध्ये संमिश्र भावना आहेत.