ST bus : तब्बल पाच वर्षानंतर महिलांच्या हाती एसटीचे 'स्टेअरिंग'; २८ महिलांनी मिळाली नियुक्ती

मुंबई : तत्कालीन परिवहन मंत्री दिवाकर रावते यांच्या कार्यकाळात महिलांच्या हाती एसटीचे स्टेअरिंग देण्याची घोषणा करण्यात आली होती. त्यानंतर २०१९ मध्ये सरळ सेवा भरती प्रक्रिया राबवण्यात आली होती. मात्र, गेल्या पाच वर्षांत या महिला उमेदवारांचे प्रशिक्षण देण्यासह त्यांच्या भरती संबंधीत प्रक्रियेचा गोँधळ उडाला होता.

त्यामूळे महिला उमेदवारांना नियुक्तीसाठी वेळोवेळी मुख्यमंत्र्यांच्या वर्षा निवासस्थानी आंदोलन सुद्धा करण्याची वेळ आली होती. मात्र, अखेर ३१ मे रोजी एकूण २०६ उमेदवारांऐवजी २८ महिला उमेदवारांना राज्यातील विविध विभागांमध्ये नियुक्ती देण्यात आली आहे.

एसटी महामंडळाने घेतलेल्या सरळ सेवा भरती प्रक्रियेमध्ये २०१९ मध्ये २०६ उमेदवार पात्र झाले होते. त्यातील महिला उमेदवारांच्या नियुक्तीची माहिती एसटी महामंडळाने दिली आहे. त्यामध्ये ३१ मे पर्यंत एक वर्षांचे अवजड वाहन प्रशिक्षण सुरू असलेल्या महिला उमेदवारांची संख्या ९ असून, त्याप्रमाणेच एक वर्ष प्रशिक्षण पुर्ण करून प्राथमीक वाहन चालन चाचणी बाकी असलेले २४, ८० दिवसांचे प्रशिक्षण सुरू असलेले ७३ तर पुर्ण झालेले २० उमेदवार आहे.

त्याप्रमाणेच गैरहजर असलेल्या उमेदवारांची संख्या ४८ असून त्यांना भरती प्रक्रियेतून त्यांना एसटी महामंडळ प्रशासनाने अपात्र घोषीत केले आहे. तर चार उमेदवार अद्याप वैद्यकीय तपासणी करून नियुक्तीसाठी प्रलंबती असल्याचे एसटी महामंडळाने सांगितले आहे.