घरात बसूनच करा बारावीचा अभ्यास

बालभारतीच्या संकेतस्थळावर पीडीएफ पुस्तके उपलब्ध
मुंबई - बारावीच्या विद्यार्थ्यांचे शैक्षणिक नुकसान होऊ नये यासाठी अभ्यासक्रमाचे साहित्य पीडीएफ स्वरूपात ऑनलाइन उपलब्ध करून देण्यात आले आहे. यासंदर्भात शालेय शिक्षणमंत्र्यांनी नुकतीच राज्यातील अधिकाऱ्यांसह ‘झूम’ ॲपच्या माध्यमातून ऑनलाइन बैठक घेऊन सूचना दिल्या होत्या.

बातम्या ऐकण्यासाठी डाऊनलोड करा ई-सकाळचे ऍप

यंदा बारावीच्या अभ्यासक्रमाची पुस्तके बदलली असली, तरी कोरोनाच्या संकटामुळे बाजारात आलेली नाहीत. त्यामुळे बारावीची पुस्तके पीडीएफ स्वरूपात उपलब्ध करून देण्याचा निर्णय शिक्षण विभागाने घेतला. त्यानुसार बालभारतीने ही पुस्तके पीडीएफ स्वरूपात http://www.ebalbharati.in/ या संकेतस्थळावर ऑनलाइन उपलब्ध करून दिली आहेत. रेडिओ आणि टीव्ही या माध्यमांतूनही अभ्यास साहित्य उपलब्ध करून देण्याबाबतही पडताळणी सुरू आहे.

शैक्षणिक वर्ष सुरू होण्यापूर्वीच विद्यार्थ्यांना दुकानांतून नवी पुस्तके मिळतात. सध्या कोरोना विषाणूचा प्रादुर्भाव रोखण्यासाठी देशात लॉकडाउन असल्यामुळे विद्यार्थी व पालकांना घराबाहेर पडणे शक्‍य होत नाही. त्यामुळे बालभारतीच्या संकेतस्थळावर ई-साहित्य उपलब्ध झाल्यामुळे विद्यार्थ्यांना घरातच बसून अभ्यास करता येईल. ऑनलाइन उपलब्ध करण्यात आलेल्या पुस्तकांमधे मराठी, हिंदी, संस्कृत, गणित, विज्ञान, तर्कशास्त्र, माहिती व तंत्रज्ञान आदी विषयांचा समावेश आहे.