शिक्षकांना घ्यावे लागणार ज्यादा तास! 'नवोदय अन्‌ शिष्यवृत्ती'पूर्वी होणार ६ सराव परीक्षा; यंदा झेडपी शाळांमधील ५० विद्यार्थी ‘नवोदय’च्या गुणवत्ता यादीत

तात्या लांडगे

सोलापूर : ‘नवोदय’च्या प्रवेशपूर्व परीक्षेसाठी सोलापूर जिल्ह्यातील ८० जागांसाठी पाच हजारांहून अधिक विद्यार्थी बसले होते. नुकताच परीक्षेचा निकाल जाहीर झाला. त्यात सोलापूर जिल्हा परिषदेच्या शाळांमधील तब्बल ५० विद्यार्थी गुणवत्ता यादीत चमकले आहेत. पोखरापूर (ता. मोहोळ) येथील नवोदय विद्यालयात त्यांना सहावी ते बारावीपर्यंतचे शिक्षण मोफत मिळणार आहे.

जिल्ह्यात सोलापूर जिल्हा परिषदेच्या दोन हजार ७७५ शाळा आहेत. त्या शाळांमधील इयत्ता पाचवीतील दोन हजार विद्यार्थी ‘नवोदय’च्या परीक्षेला बसले होते. त्यासाठी संबंधित शाळांमधील शिक्षकांनी त्यांचे जादा तास घेतले होते. अनेक विद्यार्थ्यांनी त्यांच्या गावात खासगी कोचिंग क्लास लावले होते. त्यातून ‘नवोदय’च्या परीक्षेत जिल्हा परिषदेच्या शाळांमधील विद्यार्थ्यांची टक्केवारी यंदा वाढली आहे.

दुसरीकडे इयत्ता चौथी व सातवीच्या शिष्यवृत्ती परीक्षेत देखील जिल्हा परिषदेचे विद्यार्थी चमकतील, असा विश्वास शिक्षणाधिकाऱ्यांनी व्यक्त केला आहे. शिष्यवृत्ती परीक्षेसाठी २०२६-२७ या वर्षात त्या वर्गातील सर्वच विद्यार्थी बसतील, असे नियोजन शिक्षण विभागाने केले आहे. त्यांचे परीक्षा शुल्क जिल्हा परिषदेच्या सेस फंडातून भरले जाणार आहे.

आता विद्यार्थ्यांच्या सराव परीक्षांवर भर

‘नवोदय’च्या प्रवेशपूर्व परीक्षेत सोलापूर जिल्हा परिषदेच्या शाळांमधील ५० विद्यार्थी गुणवत्ता यादीत आले आहेत. पोखरापूर येथील केंद्रीय विद्यालयात इयत्ता सहावीसाठी ८० जागा आहेत, त्यात जिल्हा परिषदेचे सर्वाधिक विद्यार्थी यंदा उत्तीर्ण झाले आहेत.

- कादर शेख, प्राथमिक शिक्षणाधिकारी, सोलापूर

शिक्षकांना घ्यावे लागणार जादा तास

आता यापुढे इयत्ता चौथी व सातवीच्या विद्यार्थ्यांचीच शिष्यवृत्ती परीक्षा होणार आहे. शिष्यवृत्ती परीक्षेसाठी जिल्हा परिषदेच्या शाळांमधील सुमारे ३० हजार विद्यार्थी बसतात. ‘नवोदय’च्या परीक्षेसाठी देखील पाच हजारांवर विद्यार्थी असतात. या पार्श्वभूमीवर दोन्ही परीक्षा होण्यापूर्वी जिल्हा परिषदेतर्फे तीन-तीन सराव परीक्षा घेतल्या जाणार आहेत. त्यासाठी शिक्षकांना जादा तास घ्यावे लागणार आहेत. जादा तास घेणे बंधनकारक नाही, पण विद्यार्थ्यांसाठी ते अतिरिक्त तास घेतील, असा विश्वास शिक्षणाधिकाऱ्यांनी व्यक्त केला आहे.