Maharashtra Politics : "सावंत बंधूंनी लाखाची सभा घेऊन दाखवावी, तर राजकीय संन्यास घेऊ"

पंढरपूर : आरोग्यमंत्री तानाजी सावंत व त्यांच्या बंधूंनी कधीही यापुढे पंढरपुरात एक लाखाच्या पुढे सभा घेऊन दाखवल्यास मी राजकीय संन्यास घेईन, असे खुले आव्हान ठाकरे गटाचे सोलापूर जिल्हाप्रमुख संभाजी शिंदे यांनी आज मंत्री सावंत यांना दिले आहे.

उद्धव ठाकरे यांची २४ डिसेंबर २०१८ ला पंढरपुरात ‘पहिले मंदिर, फिर सरकार’ सभा पार पडली होती. या सभेस राज्यभरातून शिवसेनेचे पदाधिकारी, शिवसैनिक व शिवसेना समर्थक पंढरपुरात लाखोंच्या संख्येने आले होते.

ही सभा ऐतिहासिक गर्दीची झाली होती. मात्र या सभेच्या गर्दीबाबत काल पंढरपुरात एका कार्यक्रमात बोलताना राज्याचे आरोग्यमंत्री तानाजी सावंत यांनी ‘माझ्यामुळे सात लाखांचा मेळावा झाला होता’, असे खळबळजनक विधान केले आहे.

त्यांच्या या विधानाचा आता पंढरपुरातच ठाकरे सर्मथक शिवसेना पदाधिकाऱ्यांनी समाचार घेतला असून, सावंत बंधूंनी आधी आपले होम ग्राउंड असलेल्या माढा तालुक्यात पंचायत समिती सदस्य म्हणून निवडून येऊन दाखवावे, तसेच पंढरपुरात सावंत बंधूंनी त्यांच्या नावावर एक लाखाची सभा घेऊन दाखवावी, आम्ही राजकीय संन्यास घेऊ, असे खुले आव्हान श्री. शिंदे यांनी दिले आहे. सावंत ठाकरे गटाचे आव्हान स्वीकारणार का? याकडे सर्वांचे लक्ष लागले आहे.

संभाजी शिंदे म्हणाले, वाचाळवीर आरोग्यमंत्री सावंतांनी पंढरपुरातील उद्धव ठाकरेंच्या सभेबाबत जे विधान केले, ते केवळ प्रसिद्धीच्या झोतात येण्यासाठी केले आहे. त्या सभेसाठी राज्यभरातून शिवसैनिक मोठ्या संख्येने आले होते. असे असताना सात लाखांची गर्दी आमच्यामुळे झाली, असे म्हणत असतील तर ते हास्यास्पद आहे.

ज्या ‘मातोश्री’मुळे आपण मोठे झाला आहात, त्यांच्याबद्दल बोलताना आपली उंची पाहावी, अशी टीका तालुकाप्रमुख संजय घोडके यांनी यावेळी केली.