शिक्षकांना २ ते १५ जूनपर्यंत प्रशिक्षणाचे धडे! निवड व वरिष्ठ वेतनश्रेणीचे प्रशिक्षण २ ते ११ जूनपर्यंत तर इयत्ता पहिलीच्या शिक्षकांचे प्रशिक्षण २ ते १५ जूनपर्यंत

सोलापूर : नोकरीला लागून १२ व २४ वर्षे पूर्ण झालेल्या शिक्षकांचे आता २ ते ११ जूनपर्यंत वरिष्ठ व निवडश्रेणीचे प्रशिक्षण होणार आहे. तर दुसरीकडे इयत्ता पहिलीच्या शिक्षकांना बदलेल्या अभ्यासक्रमाबद्दल २ ते १५ जूनपर्यंत प्रशिक्षण दिले जाणार आहे.

राज्यात नवीन राष्ट्रीय शैक्षणिक धोरण-२०२० ची अंमलबजावणी करताना खासगी व शासकीय अनुदानित शाळांमधील इयत्ता पहिलीच्या वर्गाचा अभ्यासक्रम बदलणार आहे. त्याअनुषंगाने त्या वर्गावरील शिक्षकांना प्रशिक्षण दिले जाणार आहे. अवघे तीन दिवसच हे प्रशिक्षण असणार आहे. राज्य, जिल्हा व तालुकास्तरावर हे प्रशिक्षण होईल. या प्रशिक्षणासाठी एकूण सात विषय असतील.

त्यात अभ्यासक्रमाचा कृती आराखडा, मूल्यमापन व एचपीसी पार्श्वभूमीवर व नमुना, भाषा शिक्षण, गणित शिक्षण, कला, आरोग्य आणि शारीरिक शिक्षण व कार्यशिक्षण असे विषय आहेत. मराठी, इंग्रजी व उर्दू माध्यमांच्या शाळांमधील इयत्ता पहिलीच्या वर्गाला शिकवणाऱ्या शिक्षकांचे प्रशिक्षण स्वतंत्र होणार आहे. जिल्हास्तरीय प्रशिक्षण २८ ते ३० मेपर्यंत होईल. २ ते १५ जूनपर्यंत जिल्हास्तरावर उर्दू व इंग्रजी माध्यमांच्या शाळांमधील शिक्षकांचे तर मराठी माध्यमाच्या शाळांमधील शिक्षकांचे २ ते १५ जूनपर्यंत प्रशिक्षण चालणार आहे.

...त्या शिक्षकांचे १३ ते १५ जूनला प्रशिक्षण

जे शिक्षक निवड व वरिष्ठ वेतनश्रेणीस पात्र आहेत, त्यांचे प्रशिक्षण सुरू असताना इयत्ता पहिलीच्या बदललेल्या अभ्यासक्रमाचे प्रशिक्षण घेता येणार नाही. त्यामुळे अशा शिक्षकांना पहिलीच्या अभ्यासक्रम बदलाचे प्रशिक्षण १३ ते १५ जून या तीन दिवसांत दिले जाणार आहे. प्रशिक्षण पूर्ण होताच नवे शैक्षणिक वर्ष (१६ जूनपासून) सुरू होणार आहे.