Shivsena Symbol: मशाल चिन्हाने शिवसेनेला दुसरा आमदार दिला आहे; काय आहे इतिहास?

मुंबईः आमदार रमेश लटके यांच्या निधनानंतर अंधेरी पूर्व पोटनिवडणुकीसाठी ३ नोव्हेंबर रोजी मतदान पार पडलं. आज मतमोजणी होत आहे. या निवडणुकीत ठाकरे गटाच्या नेत्या ऋतुजा लटके यांचा विजय निश्चित झालेला आहे. राजकीय अपरिर्ह्यतेमुळे ऋतुजा यांना धनुष्यबाणाऐवजी 'मशाल' चिन्हावर निवडणूक लढवावी लागली. परंतु मशाल या निवडणूक चिन्हावर शिवसेनेच्या आमदार होणाऱ्या त्या एकमेव आमदार नाहीत.

2 मार्च 1985 ला झालेल्या विधानसभेच्या निवडणुकीत छगन भुजबळ मशाल चिन्हावर शिवसेनेचे एकमेव आमदार म्हणून निवडून आले होते. त्याच वर्षी छगन भुजबळ नगरसेवक पदासाठी उभे असताना त्यांना मशाल हे चिन्ह मिळालं होते.

७४ नगरसेवकही निवडून आले होते

1985 साली जेव्हा बाळासाहेब ठाकरे यांनी स्वबळावर महापालिका निवडणूक लढविण्याचे ठरविले त्यावेळी देखील त्यांना मशाल हेच चिन्ह मिळाले होते. या चिन्हावर निवडणूक लढवली आणि बाळासाहेब ठाकरे यांना मोठं यश मिळालं होतं. मशाल या चिन्हावरच शिवसेनेचे 74 नगरसेवक निवडून आले आणि शिवसेनेची महापालिकेत सत्ता आली होती.

'मशाली'नेच दिला होता पहिला खासदार

औरंगाबादेत याच मशालीने शिवसेनेला पहिला खासदार निवडून दिला होता. १९८९ मध्ये औरंगाबाद लोकसभा मतदारसंघातून शिवसेनेने मोरेश्वर सावे यांना उमेदवारी दिली होती. तेव्हा त्यांची निशाणी ‘मशाल’च होती. शिवसेनाप्रमुख बाळासाहेब ठाकरे यांनी मराठवाडा सांस्कृतिक मंडळावर तेव्हा ‘मशाल’ चिन्हावरच मते मागितली होती. लोकसभा निवडणुकीत याच चिन्हाने शिवसेनेच्या लोकसभेतील विजयाची द्वारे खुली केली होती.

खऱ्या अर्थाने शिवसेनेच्या विजयाची ‘मशाल’ तेव्हाच पेटली होती, याची आठवण या निमित्ताने होत आहे. या चिन्हावर लोकसभा निवडणुकीत विजय मिळवल्यानंतर १९९८ चा अपवाद वगळता २०१९ पर्यंत औरंगाबाद लोकसभेवर शिवसेनेचाच भगवा कायम फडकत राहिला होता.

खरी शिवसेना कुणाची?

दरम्यान, शिंदे गटाने बंड केल्यानंतर 'आमचीच खरी शिवसेना' असा दावा त्यांच्याकडून करण्यात आला. त्यामुळे निवडणूक आयोगाने शिवसेनेचं धनुष्यबाण हे चिन्ह गोठवलं. अंधेरी पूर्व पोटनिवडणुकीसाठी ठाकरे गाटला आयोगाने धगधगती मशाल हे चिन्ह दिल्याने ऋतुजा लटकेंना 'धगधगती मशाल' या चिन्हावर निवडणूक लढवावी लागली. असं असतं तरी 'धनुष्यबाण' या चिन्हासाठी शिंदे आणि ठाकरे गटाची निवडणूक आयोगाकडे लढाई सुरु आहे.