Vasant More: वसंत मोरेंना वंचित बहुजन आघाडीकडून उमेदवारी जाहीर, बारामतीमध्ये सुळेंना पाठिंबा

मुंबई- वंचित बहुजन आघाडीकडून लोकसभा निवडणुकीसाठी उमेदवारांची तिसरी यादी जाहीर करण्यात आली आहे. विशेष म्हणजे वसंत मोरे यांना वंचित बहुजन आघाडीकडून पुण्यातून उमेदवारी जाहीर करण्यात आली आहे. त्यामुळे पुण्यात तिरंगी लढत होईल हे आता निश्चित झालं आहे. (Vanchit Bahujan Aaghadi declare its third list of candidates from Maharashtra )

पुण्यातून लोकसभा निवडणूक लढवण्यास वसंत मोरे ठाम होते. त्यांनी शरद पवारांशी चर्चा करुन चाचपणी केली होती. वंचितच्या प्रमुखांशीही त्यांची चर्चा सुरु होती. कोणाकडून उमेदवारी न मिळाल्यास अपक्ष लढण्याची देखील त्यांची तयारी होती. पण, त्यांना वंचितने संधी दिली आहे. वंचित आघाडीच्या अधिकृत अकाऊंटवरुन याची घोषणा करण्यात आली आहे.

वंचितने आपल्या तिसऱ्या यादीमध्ये पाच उमेदवारांनी नावे जाहीर केली आहे. शिवाय राष्ट्रवादी काँग्रेस (शरदचंद्र पवार) यांच्या बारामतीमधील उमेदवाराला पाठिंबा जाहीर केला आहे. याचा अर्थ त्यांचा विद्यमान खासदार सुप्रिया सुळे यांना पाठिंबा असणार आहे. वंचितने नांदेड, परभणी, औरंगाबाद, पुणे, शिरुर या लोकसभा मतदारसंघासाठी उमेदवार जाहीर केलेत.

वंचितचे तिसऱ्या यादीतील उमेदवार

१. अविनाश भोसिकर - नांदेड (लिंगायत)

२. बाबासाहेब भुजंगराव उगले- परभणी (मराठा)

३. अफ्सर खान- औरंगाबाद (मुस्लिम)

४. वसंत मोरे - पुणे (मराठा)

५. मंगलदास बागुल - शिरुर (मराठा)

तात्याचं ठरलं

महाराष्ट्र नवनिर्माण सेना लोकसभा निवडणूक लढणार नसल्याने वसंत मोरे नाराज होते. त्यांना पुण्याची लोकसभा लढवायची होती. त्यामुळेच त्यांनी पक्षातून बाहेर पडण्याचा निर्णय घेतला. गेल्या काही दिवसांत ते अनेक नेत्यांच्या संपर्कात होते. अखेर त्यांना वंचितने लोकसभेचं तिकीट दिलं आहे. पुण्यात वसंत मोरे काँग्रेस आणि भाजपच्या उमेदवारांना चांगली फाईट देतील असं बोललं जातंय. (Latest Marathi News)