Vinayak Mete Accident: विनायक मेटे यांच्या गाडीला अपघात; मेटे गंभीर जखमी

मुंबई : शिवसंग्राम पक्षाचे विनायक मेटे यांच्या गाडीला आज पहाटे अपघात झाला असून या अपघातात ते गंभीर जखमी झाले आहेत. यानंतर त्यांना उपचारासाठी मुंबईतील एमजीएम रूग्णालयात दाखल करण्यात आले आहे. मुंबई पुणे द्रुतगती मार्गावरील माडप बोगद्यात हा अपघात झाल्याची माहिती आहे.

(Vinayak Mete Car Accident)

दरम्यान, पहाटे विनायक मेटे आणि त्यांचे सहकारी बीडकडून मुंबईकडे येत असताना मुंबई पुणे द्रुतगती मार्गावरील माडप बोगद्याजवळ अपघात झाल्याची माहिती त्यांचे सहकारी आणि चालक एकनाथ कदम यांनी दिली. अपघात झाल्यानंतर तब्बल एका तासानंतर मदत मिळाली असल्याचं त्यांच्या सहकाऱ्यांनी सांगितलं आहे. या अपघातात गाडीचे नुकसान झाले असून मेटे यांचे स्वीय सहाय्यक आणि मेटे हे गंभीर जखमी झाले आहेत.

या अपघातात मेटे यांच्या डोक्याला आणि गुडघ्याला मार लागला आहे. त्याचबरोबर स्वीय सहाय्यकांनासुद्धा मार लागल्यामुळे त्यांनाही उपचारासाठी दाखल करण्यात आलं आहे. मेटे सध्या एमजीएम रूग्णालयातील अतिदक्षता विभागात उपचार घेत आहेत. दरम्यान एअर बॅग्स असल्यामुळे जास्त मार लागला नसल्याचं सहकारी कदम यांनी सांगितलं.

यानंतर मुख्यमंत्री एकनाथ शिंदे भाजपचे नेते प्रविण दरेकर आणि उपमुख्यमंत्री देवेंद्र फडणवीस हे त्यांच्या भेटीला जाणार आहेत. त्याबरोबर शिवसंग्राम पक्षाचे नेते आणि मेटे यांचे कुटुंबिय त्यांच्या भेटीला पोहोचणार असल्याची माहिती आहे. देवेंद्र फडणवीस आणि दरेकर हे आज मुंबई पोलिसांकडून आयोजित करण्यात आलेल्या मॅरेथॉन स्पर्धेत सहभागी झाले होते.