असं कसं बुवा? सरपंचालाही बनविले महापालिकेचा मतदार!

औरंगाबाद - महापालिका निवडणुकीसाठी तयार करण्यात आलेल्या प्रारूप मतदारयादीतील आणखी घोळ समोर येत असून, रावरसपुरा येथील सरपंचासह आठ सदस्य व सुमारे एक हजार मतदारांची नावे पडेगाव वॉर्डात समाविष्ट करण्यात आल्याचा आक्षेप घेण्यात आला आहे; तसेच रामनगरमधील १११० मतदारांची नावे मुकुंदवाडी वॉर्ड क्रमांक ८०, विठ्ठलनगर वॉर्ड क्रमांक ८३ मध्ये टाकण्यात आल्याचा आक्षेपही शनिवारी (ता. १४) दाखल करण्यात आला. 

हेही वाचा : २४ x ७ उपलब्ध असणारे चंद्रकांत खैरे नॉटरिचेबल 

घोळच घोळ चोहीकडे
महापालिका निवडणुकीच्या अनुषंगाने नऊ मार्चला प्रारूप मतदारयादी प्रसिद्ध करण्यात आली आहे. या यादीत अनेक घोळ करण्यात आले आहेत. काहींनी महापालिकेतील निवडणूक विभागातील अधिकाऱ्यांना हाताशी धरून आपल्या मर्जीतील मतदार पळविल्याचा आरोप केला जात आहे. शिवसेना व भाजपच्या पदाधिकाऱ्यांनी एकमेकांच्या विरोधात पत्रकार परिषद घेऊन आरोपही केले. या प्रारूप यादीवर आतापर्यंत सुमारे अडीचशेपेक्षा अधिक आक्षेप दाखल झाले आहेत. असे असले तरी रोज नवनवीन घोळ समोर येत आहेत.

भाजपचे मंडळ अध्यक्ष दीपक ढाकणे यांनी सांगितले, की रावरसपुऱ्याचा काही भाग महापालिकेत येतो, तर उर्वरित भागासाठी ग्रामपंचायत आहे. असे असताना महापालिकेच्या अधिकाऱ्यांनी पडेगाव वॉर्डाच्या प्रारूप मतदारयादीत रावरसपुऱ्याच्या सरपंच रजिया बेगम कुरेशी यांच्यासह त्यांचे कुटुंबीय व आठ सदस्यांची नावे समाविष्ट केली आहेत. एवढेच नाही, तर किमान एक हजारापेक्षा जास्त मतदारही समाविष्ट केले आहेत. त्यामुळे ही नावे वॉर्डातून वगळावीत, दोषी अधिकाऱ्यांवर कारवाई करण्यात यावी, अशी मागणी केली असल्याचे त्यांनी सांगितले. 

क्‍लिक करा : मतदार यादीत घोळ घालणारे चार कर्मचारी निलंबित 

रामनगरमधील ११०० मतदार इतर वॉर्डात 
रामनगरमधील १,११० मतदारांची नावे मुकुंदवाडी वॉर्ड क्रमांक ८०, विठ्ठलनगर वॉर्ड क्रमांक ८३ मध्ये टाकण्यात आल्याचा आक्षेपही शनिवारी (ता. १४) दाखल करण्यात आला आहे. मतदारांची पळवापळवी करणाऱ्या प्रगणकावर कारवाई करण्यात यावी, अशी मागणी भास्कर लहाने यांनी केली आहे.