औरंगाबादेत कोरोना कन्फर्म : ५९ वर्षीय महिलेवर खासगी हॉस्पिटलमध्ये उपचार सुरू

औरंगाबाद : जगभर थैमान घालत असलेल्या कोरोना या आजाराचा औरंगाबाद शहरात पहिला रुग्ण आढळला आहे. रशिया, कझाकिस्तानातून प्रवास करून आलेल्या या महिलेला एका खासगी रुग्णालयात दाखल करण्यात आलं असल्याची माहिती आरोग्यमंत्री राजेश टोपे यांनी मुंबईत दिली आहे. 

पीटीआय या वृत्तसंस्थेनं यासंबंधीचं वृत्त जाहीर केलं आहे. आतापर्यंत भारतात या आजाराचे सर्वाधिक रुग्ण महाराष्ट्रात आढळले आहेत. यातही पुणे शहरात या रुग्णांची संख्या सर्वात जास्त असल्याचं समोर आलं आहे. या पार्श्वभूमीवर महाराष्ट्र सरकारने राज्यभर टाळेबंदी सुरू केली आहे. 

राज्यातल्या सर्व शाळा आणि महाविद्यालयांना सोमवारपासून ३१ मार्चपर्यंत सुटी जाहीर करण्यात आली आहे. खबरदारीचे सर्व उपाय घेतले जात असले, तरीही या रुग्णांची संख्या वाढत चालली आहे. औरंगाबादेत सापडलेल्या कोरोनाग्रस्त महिलेच्या आजाराच्या निदानानंतर ही संख्या आता ३२ वर गेल्याचं आरोग्यमंत्री राजेश टोपे यांनी मुंबईत बोलताना म्हटलं आहे. 

औरंगाबादेतील या महिलेबद्दल अजून पुरेशी माहिती समोर आलेली नाही. पण तिचं वय ५९ वर्षे असून, ही महिला रशिया, कझाकिस्तानचा प्रवास करत औरंगाबादला आली होती, असं समजलं आहे.