दररोज लागतो दोन लाख लिटर ऑक्सिजन, कोविड रुग्णांसाठी वाढत आहे मागणी

औरंगाबाद : कोरोनाबाधित अनेक रुग्णांना श्‍वास घेण्यास त्रास होत आहे. त्यामुळे ऑक्सिजनची मागणी वाढली असून, महापालिकेच्या मेल्ट्रॉन येथील कोविड हॉस्पिटलसाठी दररोज सुमार दोन लाख १० हजार किलो लिटर ऑक्सिजन लागत असल्याचे समोर आले आहे. याठिकाणी ऑक्सिजनचे फक्त १३० बेड उपलब्ध आहेत. येणाऱ्या काळात ऑक्सिजन बेडची एकूण संख्या १२०० च्या घरात जाणार आहे.
कोरोनाबाधित रुग्णांच्या लक्षणांमध्ये दिवसेंदिवस बदल होत आहेत.

लॉकडाउनमुळे मद्यातून मिळणारा अकराशे कोटींचा महसूल बुडाला, मराठवाड्यातील चित्र

सौम्य लक्षणे असलेल्या रुग्णांना प्रतिकारशक्ती वाढविण्यासाठी औषधोपचार केले जातात; मात्र तीव्र लक्षणे असलेल्या व उशिराने उपचारासाठी आलेल्या रुग्णांना श्‍वास घेण्यास त्रास होतो. त्यामुळे त्यांना ऑक्सिजन द्यावा लागतो. मेल्ट्रान येथील महापालिकेच्‍या कोविड हॉस्पिटलमध्ये तीनशे खाटांची व्यवस्था आहे. यातील १३० खाटांना ऑक्सिजनची व्यवस्था करण्यात आली आहे. त्यासाठी खासगी एजन्सीकडून ऑक्सिजनचे जंबो सिलिंडर मागवले जातात. एक जंबो सिलिंडर सात हजार किलोलिटरचे असते. दिवसाकाठी असे ३० सिलिंडर याठिकाणी लागतात. एका रुग्णाला प्रतिमिनिट दहा ते साठ लिटर ऑक्सिजन द्यावा लागतो.

एका महिन्यात प्लॅंट
ऑक्सिजनची वाढती मागणी लक्षात घेता मेल्ट्रॉन येथील कोविड केअर सेंटरसाठी स्वतंत्र ऑक्सिजन प्लॅंट उभारण्याचा निर्णय महापालिकेने घेतला आहे. तसेच इतर डिलिकेडेड कोविड केअर सेंटरमध्ये ऑक्सिजन बेड वाढविले जाणार आहेत. त्यासाठी सध्या निविदा प्रक्रिया सुरू आहे. एका महिन्यात हे काम होईल, असे महापालिकेच्या आरोग्य वैद्यकीय अधिकारी डॉ. नीता पाडळकर यांनी सांगितले.
 

संपादन - गणेश पिटेकर