COVID-19 : लातुरात दोन ज्येष्ठांचा मृत्यू, 19 पॉझिटिव्ह

लातूर :  जिल्ह्यात कोरोनामुळे दररोज एका कोरोनाबाधिताचा बळी जात असल्याचे समोर येत आहे. त्यातच लातूर जिल्ह्यात रविवारी (ता. 5) दोन ज्येष्ठ नागरिकांचा मृत्यू झाल्याची माहिती समोर आली आहे. शिवाय, दिवसभरात शहर आणि जिल्ह्यात 19 कोरोना पॉझिटिव्ह रुग्ण आढळून आले आहेत.

उदगीरमधील रुग्णालयात एका कोरोनाबाधित ज्येष्ठ रुग्णाचा शनिवारी (ता. 4) रात्री बारा वाजण्याच्या सुमारास मृत्यू झाला. याची माहिती आरोग्य विभागाने आज (ता. ५) जाहीर केली. त्यामुळे उदगीरमधील मृतांची संख्या ८ झाली आहे. या रूग्णाचे वय ७६ होते. ते शहरातील देगलूर रस्ता भागात राहत होते. त्यांना रुग्णालयात गुरूवारी (ता. २) दाखल करण्यात आले होते. त्यानंतर दोनच दिवसांत त्यांचा मृत्यू झाला. त्यांना अतिताणाचाही त्रास होता, असेही सांगण्यात आले.

या घटनेनंतर लातुरातील विलासराव देशमुख शासकीय रुग्णालयात उपचार घेत असलेल्या 65 वर्षीय रुग्णाचा मृत्यू झाला. या रुग्णास दमा व निमोनिया हे आजार होते त्यांचा उपचारादरम्यान आज (ता. 5) दुपारी साडेबारा वाजता मृत्यू झाला. ते शहरातील तेली गल्ली भागात राहत होते, अशी माहिती कोरोना विलगीकरण कक्षाचे प्रमुख डॉ. मारुती कराळे, डॉ. रामराव मुंढे यांनी दिली.

कोरोना विषाणूच्या साथीबाबत सर्वप्रथम सावधानतेचा इशारा चीनने नव्हे तर...

विलासराव देशमुख शासकीय वैद्यकीय विज्ञान संस्थेतील प्रयोगशाळेत दिवसभरात 240 व्यक्तींचे स्वॅब तपासणीसाठी आले होते. यापैकी तब्बल 164 व्यक्तींचे अहवाल निगेटिव्ह आले आहेत तर 19 जणांचे अहवाल पॉझिटिव्ह आले आहेत. 22 जणांचे अहवाल अंतिम आले नाहीत तर 35 जणांचे अहवाल प्रलंबित आहेत.

पॉझिटिव्ह अहवाल आलेले 17 रुग्ण लातूरमधील आहेत. तर उर्वरित 2 रुग्ण औसा आणि अहमदपुरमधील आहेत, अशी माहिती विषाणू सांशोधन व निदान प्रयोगशाळेचे प्रमुख डॉ. विजय चिंचोलकर यांनी दिली. संस्थेच्या रुग्णालयात एकूण 78 कोरोना पॉझिटिव्ह रुग्ण सध्या दाखल आहेत. आज 3 रुग्णांची प्रकृती पूर्णपणे बरी झाल्यामुळे त्यांना घरी सोडण्यात आले आहे, असेही ते म्हणाले. पॉझिटिव्ह अहवाल आलेले रुग्ण नेमक्या कुठल्या भागातील रहिवासी आहेत, हे अद्याप जाहीर झाले नाही.

कोरोना काळामध्ये सर्वच देशांनी आता शस्त्रसंधीचे पालन करावे
 
कोरोना मीटर

• एकूण बाधित : 460
• उपचार सुरू असलेले : 190
• बरे झालेले : 247
• एकूण मृत्यू : 23