बदलीसाठी झाडावर चढून आंदोलन

परंडा : जिल्हा परिषद प्रशासनाकडे वारंवार बदली प्रक्रियेसाठी अर्ज देऊनही दखल घेत नसल्याने मानसिक त्रासामुळे येथील पंचायत समिती कार्यालयातील एका चालकाने सोमवारी (ता. 8) झाडावर चढून तासभर शोले स्टाईल आंदोलन केले. 

येथील पंचायत समितीमध्ये विकास रामलिंग चव्हाण (वय 56) हे चालक म्हणून कार्यरत आहेत. येथून बदली करावी म्हणून त्यांनी जिल्हा परिषदेच्या प्रशासनाकडे वारंवार अर्ज दिले. मात्र जिल्हा परिषद प्रशासनाने त्यांची दखल घेतली नाही. त्यामुळे सोमवारी पंचायत समिती कार्यालयासमोरील लिंबाच्या झाडावर चढुन त्यांनी शोले स्टाईल आंदोलन करीत आत्महत्येची धमकी दिली. सायंकाळी साडेचारच्या सुमारास ते झाडावर चढले. त्यानंतर तासभर त्यांचे हे आंदोलन सुरू होते. यावेळी बघ्यांची मोठी गर्दी झाली होती. सायंकाळी साडेपाचच्या सुमारास पोलिसांनी झाडावर चढून मोठ्या शिताफीने विकास चव्हाण यांना ताब्यात घेतले.