Accident News : आजारी पत्नीला भेटण्यासाठी आलेल्या पतीवर काळाचा घाला; पतीचा जागीच मृत्यू

आखाडा बाळापूर - माहेरी आलेल्या आजारी पत्नीला भेटुन परत जाणाऱ्या पतीवर काळाने घाला घातल्याने झालेल्या अपघातात मोटरसायकलने पाठीमागून जोराची धडक दिल्याने पतीचा जागीच मृत्यू झाल्याची घटना डोंगरगाव पुल शिवारामध्ये बुधवार ता. २४ घडली आहे.

याबाबत घटनास्थळावर मिळालेल्या माहितीनुसार, वसमत तालुक्यातील पांगरा शिंदे येथील पुंजाजी सखाराम बलखंडे (वय-३२) हे हिंगोली येथे ऑटो चालविण्याचे काम करतात मागील काही दिवसापासून त्यांची पत्नी आजारी असल्याने ती माहेरी बाळापुर पासून जवळच असलेल्या येलकी येथे आल्या होत्या.

त्यांना भेटण्यासाठी पुंजाजी बलखंडे हे बुधवारी भेटुन परत जात असताना नांदेड हिंगोली या राष्ट्रीय महामार्गावर असणाऱ्या डोंगरगाव पूल शिवारात पाठीमागून येणाऱ्या मोटरसायकल ने जोरदार धडक दिली ज्यामध्ये ते गंभीर जखमी झाले होते.

त्यांना आखाडा बाळापूर येथील ग्रामीण रुग्णालयात आणले असता डॉक्टरांनी त्यांचा मृत्यू झाल्याचे सांगितले. या घटनेमुळे पांगरा शिंदे, येलकी या गावांवर शोककळा पसरली व दोन्ही गावातील नातेवाईक मोठ्या संख्येने ग्रामीण रुग्णालय परिसरात जमा झाले होते.

पुंजाजी बलखंडे यांच्या पश्चात पत्नी व एक दोन वर्षां चा मुलगा आई-वडील तीन भाऊ एक बहीण असा परिवार आहे. आखाडा बाळापूर येथील ग्रामीण रुग्णालयामध्ये त्यांच्यावर शविच्छेदन करण्यात आले व प्रेत नातेवाईकांच्या ताब्यात देण्यात आले. वसमत तालुक्यातील पांगरा शिंदे या गावी त्यांच्यावर बुधवारी रात्री उशिरा शोकाकुल वातावरणात अंत्यसंस्कार करण्यात आले.आखाडा बाळापूर पोलीस स्थानकामध्ये गुन्हा दाखल करण्याची प्रक्रिया सुरू होती.