ईवळेश्वर जवळ रुग्णवाहिका उलटली

माहूर, (जि. नांदेड) ः माहूर तालुक्यातील ईवळेश्वर प्राथमिक आरोग्य केंद्राची रुग्णवाहिका वानोळा येथील रुग्ण आणण्यासाठी जात असताना ईवळेश्वर येथून काही अंतरावर रुग्णवाहिकेला अपघात झाला. अपघातात सुदैवाने यात कोणतीही जीवितहानी झाली नसून चालक सुखरूप आहे.

हेही वाचा -  नांदेडच्या ‘कंटेंटमेंट झोन’वर प्रशासनाचे लक्ष...
 

ईवळेश्वर प्राथमिक आरोग्य केंद्राची रूग्णवाहिका (एच.२६. एच.१५१२) शनिवारी (ता.२५) सकाळी दहा वाजता वानोळा येथे प्रसुतीसाठी महिलेला आणण्यासाठी जात होती. ईवळेश्वर येथून काही अंतरावर पवनाळा फाट्याजवळ रूग्णवाहीकेसमोर बकरीचे पिल्लु आले. पिल्लाला वाचविण्यासाठी चालकाने रस्त्याच्या बाजुने रूग्णवाहिका काढण्याचा प्रयत्न केला, पण रूग्णवाहिका रस्त्याच्या खाली कोसळली. सदर अपघातात चालक सुखरूप असून त्यास कुठलीही दुखापत झाली नाही. तर रुग्णवाहिकेचे नुकसान झाले आहे. अपघाताची माहीती मिळताच ईवळेश्वर येथील नागरिकांनी घटनास्थळी धाव घेऊन मदत केली.

स्वस्त धान्य दुकानदारासह महिलांना मारहाण
दुसऱ्या घटनेत कारतळा (ता.कंधार) येथील शासकीय स्वस्त धान्य दुकानदारावर धान्य वाटप करत असताना गावातील काहींनी हल्ला करत इ-पॉस मशीन फोडून धान्य फेकून दिले. तसेच जातीवाचक शिविगाळ करून मारहाण केल्याप्रकरणी कंधार पोलिस ठाण्यात गुन्हा दाखल करण्यात आला. कंधार तालुक्यातील कारतळा येथील दत्ता लक्ष्मन गायकवाड यांच्याकडे शासकीय स्वस्त धान्य दुकान आहे. ते त्यांच्या दुकानात (ता.२०) एप्रिल सकाळी नऊ वाजता स्वस्त धान्य वाटप करीत होते. या वेळी गावातील पंडित निवृत्ती कदम, अनिल विश्वाम्बर कदम, विश्वाम्बर मारोती कदम, नागेश पंडित कदम, तेजेराव विश्वांबर कदम, परमेश्वर मधुकर कदम, व्यंकटी धोंडिबा कदम, मधुकर लक्ष्मण कदम, नागेश अण्णाराव कदम, धनंजय निवृत्ती कदम, तुकाराम गोविंद कदम, अविनाश तुकाराम कदम, हणमंत कदम यांनी संगनमत करुन जातीवाचक शिवीगाळ केली. तसेच लाथा बुक्यांनी व काठ्यांनी मारहाण करत दुकानातील धान्य बाहेर फेकून दिले. या वेळी महिलांनाही मारहाण केली. दत्ता गायकवाड यांच्या फिर्यादीवरून वरील १२ जणांविरुद्ध गुन्हा नोंद करण्यात आला. परंतु अद्यापपर्यंत आरोपींना अटक करण्यात आली नाही. तपास उपविभागीय पोलिस अधिकारी किशोर कांबळे हे करीत आहेत.