परराज्यातील बनावट घातक मद्यासह दोघांना अटक 

नांदेड : विनापरवानगी परराज्यातील कमी दर्जाचे मद्य उच्च कंपनीच्या बाटलीत भरुन बेकायदेशीररित्या विक्री करण्यासाठी आलेला मद्याचा साठा उत्पादन शुल्क विभागाने जप्त केला. यावेळी या पथकाने दोघांना अटक करून मद्य वाहतुक करणारी कारसुद्धा जप्त केली. ही कारवाई बारड (ता. मुदखेड) परिसरात शुक्रवारी (ता. सात) करण्यात आली.

येथील राज्य उत्पादन शुल्क विभागाचे जिल्हा अधीक्षक निलेश सांगडे यांना मिळालेल्या गुप्त माहितीच्या आधारे त्यांनी दुय्यम निरीक्षक वाय. एस. लोळे यांना कळविले. श्री. लोळे यांनी आपल्या पथकासह दिलेल्या माहितीनुसार मुदखेड ते बारड रस्त्यावर सापळा लावला. शुक्रवारी (ता. सात) सायंकाळच्या सुमारास या रस्त्यावरून चारचाकी वाहन (एमएच२९-आर-५९९९) आले. यावेळी पथकानी हे वाहन थांबविण्याचा प्रयत्न केला. मात्र वाहनचालकांनी आपले वाहन सुसाट वेगाने पळविली. 

हेही वाचा - धक्कादायक...! चोरांकडून २९ दुचाकी जप्त

मध्यप्रदेशची बनावट घातक दारु

पथकाला संशय आल्याने त्यांनी त्या वाहनाचा पाठलाग केला. अखेर त्या वाहनाला मुदखेड शिवारातील एका धाब्याजवळ पकडले. वाहन चालक प्रकाश माणिकलाल अवस्थी आणि त्याचा साथीदार व्यंकटी बालाजी पवार यांना ताब्यात घेतले. वाहनाची तपासणी केली असता त्यात विनापरवानगी मध्यप्रदेश राज्याची बनावट दारुचा मुद्देमाल जप्त केला. विदेशी मद्य बनावट बुच लावून उच्च प्रतीचे आहे असे दाखवून काळ्या बाजारात विक्री करण्याच्या उद्देशाने ते वाहतुक करीत होते. जवळपास १८० मिली क्षमतेच्या ४८० बॉटल्या व ७५० मिली क्षमतेचे सात बॉक्स मॅकडॉल जप्त केली.

येथे क्लिक करा - शिक्षकांच्या ऑनलाइन बदली प्रक्रियेस सुरवात

पथकात यांनी घेतले परिश्रम

पथकांनी या दोघांनाही अटक करून त्यांच्याकडून वरिल मुद्देमाल व कार असा चार लाख ३२ हजाराचा मुद्देमाल जप्त केला. या कारवाईमध्ये निरीक्षक एस. एस. खंडेराय, वाय. एस. लोळे, भगवान मंडलवार, एल. बी. माटेकर,  एस. के. वाघमारे, आशालता कदम, बालाजी पवार, विकास नागमवाड, दिलीप नारखेडे यांचा सहभाग होता. पुढील तपास श्री. लोळे करत आहेत. पथकाचे अधीक्षक निलेश सांगडे यांनी कौतुक केले.