Aurangabad : पाणीटंचाई विरोधात भोकरदन नगरपालिकेवर काँग्रेसच्या वतीने महिलांचा धडक हंडा मोर्च

भोकरदन : शहरातील तीव्र पाणीटंचाई व विविध समस्या बाबतीत काँग्रेसचे जिल्हाध्यक्ष तथा माजी नगराध्यक्ष राजाभाऊ देशमुख यांच्या नेतृत्वाखाली १८ डिसेंबर सोमवारी सकाळी १२वाजता भोकरदन नगर पालिकेवर धडक हंडा मोर्चा काढण्यात आला यावेळी मोर्चा शहरातील सर्वच भागातील महिला शेकडोंच्या संख्येने उपस्थित होत्या.

भोकरदन नगर पालिकेवर मागील दोन वर्षांपासून प्रशासक आल्यानंतर नगरपरिषदचा कारभार विस्कळीत झाला असून प्रशासक आणि मुख्याधिकारी यांचे पालिके मधील कर्मचाऱ्यांवर कोणतेही नियंत्रण नसल्यामुळे शहरात तीव्र पाणीटंचाई निर्माण झाली आहे.पाणी पुरवठ्यासह नागरी सुविधा पुरविण्यात मुख्याधिकारी आणि प्रशासक पूर्णपणे अपयशी ठरले आहे.त्यामुळे शहरातील नागरिकांना विशेषतः महिला भगिनींना पाण्यासाठी भटकंती करण्याची वेळ आली आहे.

भोकरदन शहरातील काही भागात 15 दिवस काही भागात 25 दिवस तर काही भागात महिनाभरानंतर पाणी येते यावर महिलांनी नगरपरिषदे विरोधात जोरदार घोषणाबाजी केली ,पाणी नाही तर पाणीपट्टी देखील भरणार नाही असा एक सूर महिलांनी यावेळी काढला शहरातील सर्वच भागात चार दिवसाआड पाणीपुरवठा करण्यात यावा अन्यथा यापेक्षा मोठे आंदोलन करण्यात येईल असारा इशारा यावेळी महिलांनी दिला, मुख्याधिकारी संतोष वाघमारे यांना निवेदन देण्यात आले नगरपरिषदेच्या इमारती समोर महिलांनी यावेळी मडके फोडून निषेध व्यक्त केला. पंधरा दिवसात पाणीपुरवठा सुरळीत करण्याचे आश्वासन मुख्याधिकारी यांनी यावेळी दिले.

या मोर्चात काँग्रेसचे जिल्हाध्यक्ष राजाभाऊ देशमुख,युवक काँग्रेसचे जिल्हाध्यक्ष राहुल देशमुख, तालुकाध्यक्ष त्रंबक पाबळे ,राष्ट्रवादी महिला आघाडीच्या वंदना हजारे अंजना साहेबराव बारोकर ,भाऊसाहेब सोळुंके, माजी नगरसेविका गयाबाई रमेश जाधव ,एजाज पठाण ,अनिल पगारे ,अर्जुन कुराडे ,सोपान सपकाळ, पंजाबराव देशमुख ,रोशन देशमुख,प्रल्हाद लहूरकर यांच्यासह शेकडो महिला व काँग्रेसचे कार्यकर्ते उपस्थित होते