औरंगाबाद: ३६ लाखांचे दागिने पळविणारा अटकेत; पोलिसांनी अकोल्यात केली कारवाई
औरंगाबाद : लग्नातून तब्बल ३६ लाख ५० हजार रुपये किमतीचे दागिने ठेवलेली बॅग लंपास करणाऱ्यांपैकी एका चोरट्याला चिकलठाणा पोलिसांनी अकोल्यातून शनिवारी (ता.एक) रात्री अटक केली. त्‍याला ७ जानेवारी पर्यंत पोलिस कोठडीत ठेवण्‍याचे आदेश प्रथम वर्ग न्‍यायदंडाधिकारी आर. व्‍ही. सपाटे यांनी रविवारी (ता.२) दिले आहे.
अभिषेक विनोद भानुलिया (वय २०, रा. जातखेडी, ता.पाचोर जि.राजगड, मध्‍यप्रदेश) असे ताब्यात घेतलेल्या आरोपीचे नाव आहे. याबाबत प्रकरणात सुनील राधेश्‍याम जैस्‍वाल (रा. नागपूर) यांनी फिर्याद दिली. त्यानुसार, फिर्यादीचा मुलगा नैमीश याचे लग्न औरंगाबादेत संजय जैस्‍वाल यांच्‍या मुलीशी ठरले. ६ डिसेंबर २०२१ रोजी सूर्या लॉन्सवर हळदीचा कार्यक्रम सुरु होता. त्यावेळी फिर्यादीने नववधूला डायमंड सेट गिफ्ट केला व उर्वरित दागिने देत असताना व्‍याही संजय जैस्‍वाल यांनी दागिने परत घेऊन, जा असे सांगितले. त्‍यामुळे फिर्यादीने सर्व दागिने एका बॅगेत भरले व ती बॅग एका खुर्चीवर ठेवून ते नातेवाइकांच्या भेटी-गाठीसाठी गेले. हीच संधी साधत चोरट्याने दागिने असलेली बॅग लंपास केली. १०-१५ मिनिटांनी फिर्यादी बॅग घेण्‍यासाठी आले असता बॅग चोरीला गेल्याचे त्‍यांच्‍या निदर्शनास आले.
फिर्यादीने सीसीटीव्‍हीचे चित्रण तपासले असता, त्‍यात एक मुलगा बॅग घेऊन लॉनच्‍या बाहेर जाताना दिसला. गेटच्‍या बाहेर एक कार उभी होती, त्‍या कारमध्‍ये पूर्वीच एक व्‍यक्ती बसलेली होती. बॅग घेऊन आलेला मुलगा त्‍या कारमध्‍ये बसला आणि कार तेथून निघून गेल्याचे समोर आले. याप्रकरणी चिकलठाणा पोलिस ठाण्‍यात गुन्‍हा दाखल करण्‍यात आला होता. गुन्‍ह्याचा तपास सुरु असताना अकोला जिल्ह्यातील सिव्हिल लाईन पोलिसांनी एका चोरीच्‍या गुन्‍ह्यात आरोपी अभिषेक भानुलिया याला अटक केली असून त्‍याने साथीदारांसह अकोला, वर्धा, औरंगाबादसह इतर जिल्ह्यात देखील चोरी केल्याची कबुली दिली आहे. अशी माहिती चिकलठाणा पोलिसांना मिळाली. त्यानुसार पोलिसांनी आरोपी भानुलिया याला ताब्यात घेत अटक केली. न्यायालयात सहायक सरकारी वकील डी. आर. काठुळे यांनी युक्तिवाद केला.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
