महापालिका निवडणूक : आचारसंहिता लागणार २० मार्चपर्यंत

औरंगाबाद - महापालिकेच्या आगामी निवडणुकीसाठी सोमवारी (ता. २४) राज्य निवडणूक आयोगाने वॉर्डरचना अंतिम केली असून, पुढील सात दिवसांत मतदारयादी प्रसिद्ध केली जाईल. त्यावर हरकती मागविण्यात येतील, तर २० ते २३ मार्चदरम्यान महापालिका निवडणुकीची आचारसंहिता लागण्याची शक्यता असल्याचे सांगण्यात आले.

महापालिकेची आगामी एप्रिल महिन्यात निवडणूक होणार आहे. त्यानुसार काही दिवसांपासून राज्य निवडणूक आयोगाने तयारी सुरू केली आहे. महापालिकेच्या निवडणूक विभागाने तयार केलेल्या प्रस्तावानुसार तीन फेब्रुवारीला आरक्षण सोडत काढण्यात आली होती. त्यानंतर प्रारूप वॉर्डरचना प्रसिद्ध करण्यात आली.

ठळक बातमी : सिद्धार्थ प्राणिसंग्रहालय होणार बंद ? 

मात्र त्यात अनेक पदाधिकारी, दिग्गज नगरसेवकांच्या सोयीसाठी गडबडी करण्यात आल्याचे समोर आले होते. वॉर्डांच्या सीमा मनमानी पद्धतीने फोडून प्रगणक गट आश्चर्यकारकरीत्या बदलण्यात आले होते. त्यामुळे या प्रारूप वॉर्डरचनेवर तब्बल ३७० आक्षेप घेण्यात आले. या आक्षेपांवर १५ फेब्रुवारीला सुनावणी घेण्यात आली होती. 

सोमवारी वॉर्डरचना अंतिम करण्यात आली असून, मंगळवारी (ता. २५) नागरिकांना ती पाहण्यासाठी उपलब्ध होईल. वॉर्डरचना अंतिम झाली असल्याने आता निवडणूक कार्यक्रमाविषयी उत्सुकता निर्माण झाली आहे.

याबाबत सूत्रांनी सांगितले की, येत्या सात दिवसांत मतदारयादी प्रसिद्ध होईल. ३१ जानेवारीच्या मुदतीतील ही मतदारयादी असेल. या यादीवर हरकती, आक्षेप घेऊन सुनावणी झाल्यानंतर तीन दिवसांत ती अंतिम करण्यात येईल.

हेही वाचा : स्टॅंप ड्युटीमुळे खेळण्याचे मार्केट संथ

दरम्यान, १२ निवडणूक निर्णय अधिकाऱ्यांची नियुक्तीदेखील करण्यात येईल. २० ते २३ मार्चदरम्यान निवडणुकीची आचारसंहिता लागण्याची शक्यता असल्याचे सूत्रांनी सांगितले.

२३ एप्रिलपर्यंत नवे नगरसेवक

विद्यमान महापौरांची मुदत २९ एप्रिलला संपणार आहे. त्यापूर्वी नव्या महापौर निवडीसाठी प्रक्रिया पूर्ण होणे गरजेचे असून, २३ एप्रिलपूर्वी महापालिकेची निवडणूक पूर्ण करून नगरसेवकांची नावे शासन राजपत्रात प्रसिद्ध करणे गरजेचे आहे. निवडणूक कार्यक्रमाचा विचार करता, उमेदवारांना प्रचारासाठी फक्त २० ते २५ दिवस मिळण्याची शक्यता आहे. 

क्‍लिक करा : बेगमपुरा - पहाडसिंगपुरा वॉर्डाला तीर्थक्षेत्राचा दर्जा