औरंगाबाद : बियाणे घेतले तरच रासायनिक खते | Sakal
sakal

बोलून बातमी शोधा

Aurangabad buy seeds then Chemical fertilizers agricultural service center

औरंगाबाद : बियाणे घेतले तरच रासायनिक खते

फुलंब्री : तालुक्यामध्ये सध्या काही भागात पाऊस पडला तर काही भागातही आता पावसाला सुरुवात होत असून शेतकरी आता खरीप पिकाच्या लागवडीसाठी कृषी सेवा केंद्रचालकाकडे बियाणे व रासायनिक खते घेण्यासाठी जात आहे. मात्र, काही कृषी सेवा केंद्रचालक बियाणे घेतले तरच रासायनिक खते देतो, असा पवित्रा घेत असल्याने शेतकरी अडचणीत सापडला आहे. अशा दुकानदारांवर कारवाई करावी, अशी मागणी शेतकऱ्यांनी केली आहे.

सध्याच्या खरीप हंगामामध्ये शेतकरी पेरणी करण्यासाठी तालुक्यात ठिकठिकाणी असलेल्या कृषी सेवा केंद्रातून बी-बियाणे व रासायनिक खते घेऊ लागले आहे. मृग नक्षत्रात पेरणी झाल्यास शेतकऱ्यांना चांगले उत्पन्न मिळते अशी अपेक्षा आहे. त्यामुळे बी-बियाणे व रासायनिक खते घेण्यासाठी बाजारात शेतकरी गर्दी करीत आहे. मात्र फुलंब्री शहरासह तालुक्यात असणाऱ्या काही कृषी सेवा केंद्र दुकानांमध्ये बियाणे व रासायनिक खते देताना कृषी सेवा केंद्रचालक अडवणूक करीत असल्याचे चित्र आहे.

शेतकऱ्याची पसंती असलेल्या कृषी सेवा केंद्रांमध्ये केवळ बियाणे उपलब्ध असल्याने ते बियाणे घेऊन जात आहे तर उर्वरित रासायनिक खते घेण्यासाठी इतर कृषी सेवा केंद्र दुकानात गेल्यानंतर कृषी सेवा केंद्र चालक बी-बियाणे घेण्याची सक्ती करीत आहे.

बियाणे घेतले तरच रासायनिक खते मिळतील असे बळिराजाला सांगण्यात येत आहे. त्यामुळे कृषी विभागाने शेतकऱ्यांची अडवणूक होऊ नये, यासाठी कृषी सेवा केंद्रचालकांना सूचना द्याव्यात अशी मागणी शेतकऱ्यांनी केली आहे.

पथक केवळ कागदोपत्री

फुलंब्री तालुक्यातील कृषी सेवा केंद्रचालक दुकानातून रासायनिक खते व बियाणे शेतकऱ्यांना चांगली दर्जाचे देण्यासाठी कृषी विभागामार्फत पथक तैनात केले आहे. मात्र, सदरील पथक कागदोपत्री असल्याचे दिसून येत आहे. वेगवेगळ्या नामांकित कंपनीचे बियाणे व रासायनिक खते बाजारात उपलब्ध आहे. तर इतर कंपनीचे हलक्या दर्जाचे बियाणेही उपलब्ध आहे. जास्तीच्या फायद्यासाठी शेतकऱ्यांची फसवणूक होऊ शकते. मात्र, कृषी विभागाच्या पथकाकडून कृषी सेवा केंद्र तपासणी सातत्याने करणे गरजेचे आहे.

खरीप हंगामासाठी बी-बियाणे व रासायनिक खते खरेदी करताना अडचणी येत आहे. मी ओळखीच्या कृषी सेवा केंद्रात बियाणे खरेदी केले. रासायनिक खते त्यांच्याकडे नसल्यामुळे शहरातील इतर दुकानात रासायनिक खते घ्यायला गेलो. मात्र बी-बियाणे घेतले तरच रासायनिक खते देतो, अशी अडवणूक कृषी सेवा केंद्र चालकांनी केली आहे. अशा दुकानावर कृषी अधिकाऱ्यांनी कारवाई करावी.

- रावसाहेब मालोदे, शेतकरी, दरेगाव दरी

Web Title: Aurangabad Buy Seeds Then Chemical Fertilizers Agricultural Service Center

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top