औरंगाबाद : विमानतळ विस्तारीकरण पुन्हा ऐरणीवर

औरंगाबाद : चिकलठाणा आंतरराष्ट्रीय विमानतळाच्या धावपट्टी विस्तारीकरणासाठी केंद्रीय उड्डाण मंत्रालयाच्या सूचनेनुसार जिल्हाधिकारी सुनील चव्हाण यांनी उपजिल्हाधिकारी प्रभोदय मुळे यांच्या अध्यक्षतेखाली सात जणांची भूसंपादन समिती नियुक्त केली आहे. ही समिती आता दक्षिण बाजूने १४७ एकर जमिनीची मोजणी करणार असून, मोजणीनंतर नवा प्रस्ताव शासनाला सादर केला जाणार आहे.

चिकलठाणा विमानतळाच्या विस्तारीकरणाचा अनेक वर्षांपासून प्रयत्न सुरू आहेत. यासंदर्भात केंद्रीय अर्थराज्यमंत्री डॉ. भागवत कराड यांनी पुढाकार घेतला आहे. नुकतीच केंद्रीय नागरी उड्डाणमंत्री ज्योतिरादित्य सिंधिया यांच्या अध्यक्षतेखाली दिल्ली येथे बैठक घेण्यात आली होती. त्यात झालेल्या निर्णयानुसार जिल्हाधिकारी श्री. चव्हाण यांनी उपजिल्हाधिकारी श्री. मुळे यांच्या अध्यक्षतेखाली भूसंपादन समिती नियुक्त केली आहे.

या समितीमध्ये उपविभागीय अधिकारी रामेश्वर रोडगे, तहसीलदार ज्योती पवार, विमानतळ निदेशक डी. जी. साळवे, नगररचना विभागाचे सहायक संचालक एस. एस. खरवडकर, भूमी अभिलेखचे दुष्यंत कोळी, महापालिकेच्या नगर विभागाचे उपसंचालक ए. बी. देशमुख यांचा समावेश आहे.

जागा कमी अन् मोबदलाही कमी

विमानतळाच्या धावपट्टीची लांबी सध्या नऊ हजार ३०० फूट आहे. मात्र मोठी विमाने उतरण्यासाठी धावपट्टीची लांबी १२ हजार फूट करावी लागणार आहे. धावपट्टी विस्तारासाठी विमानतळाच्या उत्तर दिशेने १८२ एकर जमीन भूसंपादनाचा निर्णय यापूर्वी घेण्यात आला होता. त्यानुसार तीन महिन्यांपूर्वीच मोजणीचा अहवाल व भूसंपादनासाठी लागणारा खर्च विमानतळ प्राधिकरणास कळविण्यात आला. पण त्यात शेकडो घरे असल्याने जागेसह बांधकामाचाही मोबदला द्यावा लागणार होता. याउलट विमानतळाच्या दक्षिण बाजूने मोकळी जागा असल्याने मोबदला कमी द्यावा लागेल. रक्कम कमी असेल, १८२ ऐवजी १४७ एकरच जमीन संपादित करावी लागणार आहे, असा प्रस्ताव समोर आला. त्यानुसार नव्याने मोजणी होणार आहे.