विधवा प्रथा बंदीचा माणगावातही निर्णय

रुकडी : हेरवाड (ता. शिरोळ) ग्रामपंचायतीप्रमाणेच माणगाव (ता. हातकणंगले) ग्रामपंचायतीनेही विधवा प्रथा बंद करण्याचा निर्णय नुकत्याच झालेल्या मासिक सभेत घेतला. यासंदर्भात गावात जनजागृती करण्याचा तसेच विधवा महिलांना सन्मान देण्याचा ठरावही झाला. संध्याराणी जाधव सूचक, तर सुनीता मगदूम अनुमोदक होत्या. समाजामध्ये विधवांना योग्य सन्मान न दिल्याने त्याचा त्यांच्या मानसिकतेवर परिणाम होत असल्याने हा निर्णय घेतला. (Ban Widow Rituals)

या विधायक कार्याचा वारसा इतर ग्रामपंचायतीने घेणे गरजेचे असल्याचे सरपंच राजू मगदूम यांनी सांगितले. समाजामध्ये विधवांच्या कपाळावरील कुंकू पुसणे, पायातील जोडव्या काढणे, हातातील बांगड्या फोडणे, गळ्यातील मंगळसूत्र काढणे अशी अमानवी कृत्य करण्यात येतात. शिवाय विधवांना धार्मिक, सामाजिक कार्यात सहभागी करून घेतले जात नाही. यामुळे अशा महिलांच्या नैसर्गिक हक्कावर गदा येते. तो कायद्याचा भंगही आहे.

गावासह देशात विधवांना सन्मानाने जगता यावे, यासाठी ही प्रथा बंद कण्याचा निर्णय ठराव सभेमध्ये बहुमताने मंजूर करण्यात आल्याचे सरपंचांनी सांगितले. ग्रामपंचायत सदस्या संध्याराणी जाधव यांनी या ठरावाची अंमलबजावणी स्वतःच्या घरापासून केली आहे. दरम्यान, गावातील मुलीच्या विवाह समारंभात ग्रामपंचायतीतर्फे आशीर्वाद म्हणून माहेरची साडी (पैठणी) भेट देण्याचा निर्णयही या सभेत घेण्यात आला.