Aurangabad News: परीक्षा देणाऱ्या डमी विद्यार्थ्यांसह एकजण अटकेत

Aurangabad Crime News : चिकलठाणा एमआयडीसी भागातील आयऑन परीक्षा सेंटरवर दुसऱ्याच विद्यार्थी मित्राच्या जागेवर परीक्षा देणाऱ्या डमी विद्यार्थी मित्राला एमआयडीसी सिडको पोलिसांनी १ फेब्रुवारी रोजी दुपारी अटक केली. तर ज्याच्या जागेवर परीक्षा देण्यासाठी आला होता. त्या मूळ विद्यार्थी मित्राला २ फेब्रुवारी रोजी पोलिसांनी अटक केली.

अविनाश सजन गोमलाडू (वय २१, रा. भिवगाव, ता. वैजापूर) असे अटकेतील डमी विद्यार्थ्याचे आहे, तर विकास शाहुबा शेळके (२३, रा. टाकळी, पोस्ट मोहरा, ता. कन्नड) या मूळ विद्यार्थी मित्राचे नाव आहे.

एमआयडीसी सिडको पोलिसांनी सांगितले की, चिकलठाणा एमआयडीसीतील आयऑन डिजिटल झोनचे विभागीय व्यवस्थापक वैभव पवार पाटील यांनी फिर्याद दिली की, १ फेब्रुवारी रोजी केंद्रीय सशस्त्र बलाच्या कॉन्स्टेबल, रायफल्समॅन आणि नारकोटिक्स कंट्रोल ब्यूरोमध्ये शिपाई पदाची परीक्षा आयऑन सेंटरमध्ये ऑनलाइन पद्धतीने होती.

दरम्यान, आरोपी अविनाश याने विकासच्या नावावर परीक्षा हॉलमध्‍ये प्रवेश केला. मात्र, त्याची हालचाल संशयास्पद वाटत असल्याने त्याच्या प्रवेशपत्राची कसून तपासणी केली असता त्याने दुसऱ्याच्या नावावर परीक्षा देण्यासाठी आल्याचे सांगितले.

त्याची झडती घेतली असता त्याच्या ताब्यात एक ब्लूटूथ, एक मक्खी हेडफोन, मोबाइल, पॅनकार्ड आणि विकासचे आधारकार्ड सापडले. याप्रकरणी आरोपी विकास यांच्याविरोधातही गुन्हा दाखल करण्यात आला होता. त्याचा पोलिसांनी माग काढत अखेर त्‍यालाही २ फेब्रुवारी रोजी अटक करण्यात आली. पुढील तपास पीएसआय सचिन जाधव करत आहेत.