
औरंगाबाद : कर्मचाऱ्याच्या पित्याकडून रुग्णालयाची तोडफोड
वाळूजमहानगर : रुग्णालयात कामावरून कमी केल्याचा राग व कामाचे पैसे न दिल्याने एका कर्मचाऱ्याच्या पित्याने दोन मित्रांसह डॉक्टर व कर्मचाऱ्यांना शिवीगाळ करत मारहाण करून रुग्णालयाची तोडफोड केली. ही घटना शनिवारी बजाजनगर येथे घडली.
बजाजनगर येथील अष्टविनायक हास्पिटल या रुग्णालयात लॅब, एक्सरे टेक्निशियन म्हणून सुरेश जाधव हा कार्यरत होता. दरम्यान सुरेश याचे रुग्णालयातील महिला कर्मचाऱ्यासोबत सुत जुळल्याच्या संशयावरून रुग्णालय प्रशासनाने त्याला कामावरून काढून टाकले. त्याचा अडीच महिन्यांचा पगार ४५ हजार रुपये न दिल्याचा आरोप सुरेश यांचे वडील एस एन जाधव यांनी केला आहे. शिवाय त्याच्यावर मुलीची छेडछाड केल्याचा आरोप लावण्यात आला.
पगार न देता बदनामी केली तसेच डॉक्टर व कर्मचाऱ्यांनी धक्काबुक्की करून मारहाण केल्याच्या रागातून सुरेश याचे वडील व त्याच्या दोन मित्रांनी शनिवारी दुपारी चार वाजेच्या सुमारास रुग्णालयात जाऊन तोडफोड केली. दरम्यान डॉक्टरांसह रुग्णालयातील कर्मचाऱ्यांना मारहाण करून रुग्णालयाची तोडफोड करणाऱ्या तिघांनाही पोलिसांनी ताब्यात घेतले. याप्रकरणी वाळूज एमआयडीसी पोलिस ठाण्यात गुन्हा दाखल करण्याची प्रक्रिया रात्री उशिरापर्यंत सुरू होती.
पोलिस उशिरा आले : डॉक्टरचा आरोप
या मारहाण आणि तोडफोडीची घटना रुग्णालयातील सीसीटीव्हीत कैद झाली असून घटना सुरू असताना पोलिसांना माहिती दिली. मात्र हाकेच्या अंतरावर असलेल्या पोलिस ठाण्याचे कर्मचारी घटनेच्या दोन तासांनंतर घटनास्थळी आले. तोपर्यंत रुग्णालयातील नर्ससह डॉक्टर प्रेमदास राठोड यांना तसेच मेडिकल रिप्रेझेंटेटिव्ह आणि रुग्णाच्या नातेवाइकांना मारहाण करून रुग्णालयाची तोडफोड केल्याचा आरोप रुग्णालय प्रशासनाने केला.
Web Title: Aurangabad Hospital Damage By Employee Father Money Issue
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..