मायमराठीत स्वाक्षरीच्या भिंतीने वेधले सर्वांचे लक्ष

उदगीरः अखिल भारतीय मराठी साहित्य संमेलनामुळे साहित्यमय झालेल्या उदगीरच्या वातावरणात शहरातील व्यापाऱ्याने ‘मराठी स्वाक्षरी भिंत’ उभी केली आहे. या स्वाक्षरी भिंतीने अनेकाचे लक्ष वेधले.

भारतरत्न स्वरसम्राज्ञी लता मंगेशकर साहित्यनगरीसमोर शहरातील व्यापारी ओमप्रकाश गर्जे यांनी आपली स्वाक्षरी मराठीत करावी, नागरिकांना प्रेरणा मिळावी, यासाठी ‘स्वाक्षरी भिंत’ उभी केली. या भिंतीवर नागरिकांनी मराठीत स्वाक्षरी करावी, असे आवाहन केले.

श्री. गर्जे यांच्या या आवाहनाला नागरिकांसह विद्यार्थ्यांनी उत्स्फूर्त प्रतिसाद दिला आहे. आपली स्वाक्षरी मराठीत करून ‘मी मराठी माझी स्वाक्षरी मराठी’ असा स्वाभिमान व्यक्त करावा, अशी अपेक्षा या उपक्रमातून व्यक्त केली आहे. अनेक तरुणांनी या भिंतीवर मराठीत स्वाक्षरी करून आपला सहभाग नोंदविला. अनेक विद्यार्थ्यांनी मराठीत स्वाक्षरी करून आपल्या विद्यालयाचे नावही यावर लिहिले आहे.