Aurangabad : व्यावसायिक मालमत्तांना गुन्ह्यासोबत आता दंडही | Sakal
sakal

बोलून बातमी शोधा

Aurangabad Municipality Fine Against Illegal Water Tap

Aurangabad : व्यावसायिक मालमत्तांना गुन्ह्यासोबत आता दंडही

औरंगाबाद : शहरातील पाणीप्रश्‍न सोडविण्यासाठी महापालिकेने बेकायदा नळांविरोधात कारवाई सुरू केली आहे. त्यात मुंबई उच्च न्यायालयाच्या औरंगाबाद येथील खंडपीठाने शहरातील हॉटेलच्या बेकायदा तीन इंचाच्या नळांवर कारवाई करण्याचे आदेश दिले आहेत. त्यानुसार सोमवारपासून बड्या आस्थापनांवर कारवाई केली जाणार आहे. बेकायदा नळप्रकरणी आता गुन्हाही दाखल होईल आणि दंडही आकारला जाणार असल्याचे पथकप्रमुख तथा मुख्य लेखाधिकारी संतोष वाहुळे यांनी सांगितले.

शहरात उन्हाळ्यात तीव्र पाणीटंचाई निर्माण झाली होती. त्यानुसार महापालिकेने ४२ कलमी कार्यक्रम हाती घेऊन उपाययोजना सुरू केल्या. त्यात मुख्य पाइपलाइनवरील बेकायदा नळ तोडण्याच्या कामाचा समावेश होता. दरम्यान, न्यायालयानेदेखील बेकायदा नळांवर कारवाई करण्याचे आदेश दिले. त्यानुसार महापालिकेचे प्रशासक डॉ. अभिजित चौधरी यांनी बेकायदा नळांवर कारवाई करण्यासाठी तीन पथके स्थापन केली आहेत. या पथकांमार्फत १७ जूनपासून आतापर्यंत ८९९ बेकायदा नळांवर कारवाई करण्यात आली.

दरम्यान याप्रकरणी शुक्रवारी मुंबई उच्च न्यायालयाच्या औरंगाबाद येथील खंडपीठात सुनावणी झाली असता, हॉटेलच्या बेकायदा तीन इंची कनेक्शनवर कारवाई करण्याचे आदेश महापालिकेला देण्यात आले. त्यानुसार सोमवारपासून मोठ्या आस्थापनेवर कारवाई केली जाणार आहे. महापालिकेने मुख्य पाइपलाइनवरून बेकायदा नळ घेणाऱ्यांविरोधात गुन्हे दाखल करण्याचा निर्णय घेतला होता. त्यानुसार संबंधित पोलिस ठाण्यात तक्रारी देखील देण्यात आल्या आहेत. आता बड्या आस्थापनेवर कारवाई केल्यानंतर गुन्ह्यासोबत दंडात्मक कारवाई करण्यात येईल, असे श्री. वाहुळे यांनी सांगितले.

तेरा व्यावसायिक नळांवर कारवाई

शनिवारी श्री. वाहुळे यांच्या पथकाने पाटीदार भवनाजवळ, अमरप्रीत हॉटेलसमोर, व्यावसायिक अवैध नळजोडण्या तोडल्या. दुपारी दीड ते सायंकाळी पाचपर्यंत ही कारवाई करण्यात आली. ही कारवाई पथक अभियंता रोहित इंगळे, कनिष्ठ अभियंता किरण तमनार, कर्मचारी मोहमंद शरीफ, तमिझ पठाण, वैभव भटकर, सागर डिघोळे यांनी केली.

Web Title: Aurangabad Municipality Action Fine Against Illegal Water Tap

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..