औरंगाबाद : पाणीपुरवठ्यावर 'वादळी वाऱ्याचे' विघ्न | Sakal
sakal

बोलून बातमी शोधा

Aurangabad water supply Problem Stormy winds Jayakwadi power off

औरंगाबाद : पाणीपुरवठ्यावर 'वादळी वाऱ्याचे' विघ्न

औरंगाबाद : फारोळा येथील जल शुद्धीकरण केंद्रात बिघाड झाल्याचा प्रकार ताजा असतानाच शुक्रवारी रात्री वादळी वाऱ्याने महापालिकेला फटका दिला. जायकवाडी व ढोरकीन येथील पंपहाऊसचा वीज पुरवठा दीड तास बंद करण्यात आल्याने शहराचा पाणी पुरवठा विस्कळीत झाला. शनिवारी काही भागात कमी दाबाने तर काही भागात उशिराने पाणी पुरवठा करण्यात आला.

शहराच्या पाणी पुरवठ्यावर वारंवार विघ्न येत आहे. कधी पाइपलाइन फुटून तर कधी तांत्रिक अडचणीमुळे पाणी पुरवठा विस्कळित होत आहे. एकीकडे शहरात पाण्याची मागणी वाढली असताना दुसरीकडे वारंवार येणाऱ्या अडचणीमुळे महापालिकेचा पाणी पुरवठा विभाग हतबल झाला आहे. फारोळा येथील जलशुद्धीकरण केंद्राला वीज पुरवठा करणाऱ्या पॅनलमध्ये बिघाड झाल्याने शुक्रवारचा पाणी पुरवठा विस्कळित झाला होता. पाणीपुरवठा विभागाच्या अधिकारी-कर्मचाऱ्यांनी पहाटे तीन वाजेपर्यंत जागून दुरुस्ती केली. त्यानंतर शहरातील पुरवठा सुरळीत होत नाही तोच शुक्रवारी वादळी वाऱ्यामुळे वीज वितरण कंपनीने दीड तास पाणी पुरवठा योजनेचा वीज पुरवठा बंद केला.

याविषयी पाणी पुरवठा विभागाची जबाबदारी असलेले निवृत्त कार्यकारी अभियंता हेमंत कोल्हे यांनी सांगितले की, वादळी वाऱ्यामुळे जायकवाडी येथील पंपगृहाचा वीज पुरवठा रात्री ११.४५ वाजता बंद केला. तो मध्यरात्री १.१५ ला सुरू करण्यात आला. याच वेळेत ढोरकीनचा देखील वीज पुरवठा बंद झाला होता. दीड तास पाणी उपसा बंद राहिल्यामुळे शहरात पाणी येण्यास पुन्हा विलंब झाला. मध्यरात्री १२.३० वाजता सिडको एन-५ येथील पाण्याच्या टाकीचा वीज पुरवठा २० मिनिटे बंद होता. त्यामुळे काही भागात पुरवठा विस्कळित झाला. अनेक भागात कमी दाबाने तर काही ठिकणी उशिराने पाणी मिळाले. पाणी पुरवठा विभागाला नागरिकांनी सहकार्य करावे, असे आवाहन श्री. कोल्हे यांनी केले.

Web Title: Aurangabad Water Supply Problem Stormy Winds Jayakwadi Power Off

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top