Chh. Sambhaji Nagar : वर्षभरात घरे होणार डिजिटल! इंडसइंड बॅंकेतर्फे लागणार शहरात ॲड्रेस बोर्ड

छत्रपती संभाजीनगर - शहरातील प्रत्येक घरावर क्यूआरकोड असलेला डिजिटल ॲड्रेस नंबर असलेला बोर्ड लावण्याचा निर्णय महापालिकेचे प्रशासक जी. श्रीकांत यांनी घेतला आहे. हे काम इंडसइंड बॅंकेतर्फे केले जाणार असून, रेड मिलन कंपनी असे बोर्ड तयार करणार आहे. मंगळवारी महापालिकेने इंडसइंड बॅंकेला कार्यारंभ आदेश दिले असून, येत्या वर्षभरात हे काम केले जाणार आहे.

महापालिकेचे प्रशासक जी. श्रीकांत यांनी शहरातील प्रत्येक घरावर डिजिटल ॲड्रेस नंबर असलेला बोर्ड लावण्याचा निर्णय घेतला होता. या बोर्डवर प्रत्येक घराचा क्यूआरकोड असेल. त्यानुसार घराची ओळख तयार होईल. एखाद्याला घराचा पत्ता द्यायचा द्यायचा असेल तर क्यूआर कोडवरून तो घरापर्यंत पोचू शकेल.

तसेच महापालिकेच्या विविध सेवा, अत्यावश्‍यक सुविधा पुरविण्यासाठी देखील डिजिटल ॲड्रेसचा फायदा होणार आहे. रायपूर शहरात अशा प्रकारचे बोर्ड लावण्यात आले आहे. महापालिका अधिकाऱ्यांनी या शहरात जाऊन पाहणी केली होती. इंडसइंड बॅंकेने शहरात डिजिटल ॲड्रेस नंबर असलेला बोर्ड लावून देण्याची तयारी दर्शविली होती. त्यानुसार गेल्या काही दिवासांपासून महापालिका व इंडसइंड बॅंकेच्या अधिकाऱ्यांमध्ये बैठकांचे सत्र सुरू होते.

मंगळवारी अखेर या बॅंकेला महापालिकेने कार्यारंभ आदेश दिले आहेत. रेडमेलोन ही कंपनी अशा प्रकारचे बोर्ड तयार करून देणार आहे. हे काम नऊ महिने ते एक वर्षापर्यंत चालणार असल्याचे प्रशासक जी. श्रीकांत यांच्या उपस्थितीत झालेल्या बैठकीत सांगण्यात आले.

महाराष्ट्रातील पहिले शहर ठरणार

यावेळी प्रशासक जी. श्रीकांत म्हणाले, हा प्रकल्प केंद्र शासनाच्या डिजिटल इंडिया मिशन आणि राज्य शासनाच्या शासन आपल्या दारी प्रकल्पाच्या अंतर्गत सेवा पोचवण्याची प्रक्रिया पुढे नेईल. छत्रपती संभाजीनगर हा महत्त्वाकांक्षी प्रकल्प राबविणारे महाराष्ट्रातील पहिले शहर असेल. यावेळी स्मार्ट सिटीचे अतिरिक्त मुख्य कार्यकारी अधिकारी अरुण शिंदे, महापालिकेचे अतिरिक्त आयुक्त रणजित पाटील, सौरभ जोशी, शहर अभियंता ए. बी. देशमुख, उपायुक्त अपर्णा थेटे, स्मार्ट सिटीचे फैज अली, इंडसइंड बँकेचे अंकित पारिख, रेडमेलोन कंपनीचे मोहित चेलारामानी उपस्थित होते.