Chh. Sambhaji Nagar : बनावट औषधी विक्रीचा पर्दाफाश शहरात आढळला युरिमॅक्स- डीचा बनावट साठा

छत्रपती संभाजीनगर - सौम्य प्रोस्टॅटीक हायपरप्लासिया या प्रोस्टेट ग्रंथीशी संबंधीत आजारावरील रुग्णांच्या उपचारासाठी युरिमॅक्स- डी हे औषधी दिले जाते. मात्र, या औषधी बनावट स्वरूपात विकण्यात येत असल्याच्या माहितीवरुन अन्न व औषध प्रशासन आणि पोलिसांनी बन्सीसलालनगर येथे छापा मारुन कारवाई केली. या कारवाईत बनावट औषधी साठा तसेच डी.के. फार्मा कंपनीचे मालक, तसेच सदर औषधींचा पुरवठा करणाऱ्या बिहारच्या कंपनीच्या विरोधात गुन्हा दाखल करण्यात आला आहे.

वेदांतनगर पोलिसांनी दिलेल्या माहितीनुसार, शहरात बनावट औषधी विक्री होत असल्याची माहिती अन्न व औषधी विभागाच्या अधिकाऱ्यांना मिळाली होती. बन्सीलालनगर भागातील श्रीराम कॉम्प्लेक्स येथील डीके फार्मा या कंपनीतून हा माल पुरवठा केला जात होता. या माहितीआधारे अन्न व औषध निरीक्षक बळीराम मरेवाड यांच्यासह पोलिस कर्मचारी आणि अन्य अधिकाऱ्यांनी मंगळवारी (ता. दहा) डी. के. फार्मा या कंपनीतून शहरात आणि जिल्ह्यात विविध ठिकाणी पुरवठा होत असलेल्या युरिमॅक्स डी या गोळ्यांची (औषधी) तपासणी केली. तपासणीत सदर औषधी या बनावट असल्याची माहिती समोर आली.

अन्न व औषधी विभागाने या कंपनीतील औषधी सील करून २४ युरिमॅक्स औषधींच्या स्ट्रीप ताब्यात घेतल्या आहेत. या प्रकरणी डी. के. फार्माचे संजय गर्ग, विनीत कुमार, एक महिला, मे मार्स फार्मा लाईन बाजार बिहार व इतर काही जणांविरोधात वेदांतनगर पोलिस ठाण्यात गुन्हा दाखल करण्यात आला. या प्रकरणाचा तपास पोलिस उपनिरिक्षक उत्रेश्वर मुंडे हे करत आहेत.

बिहारहून मालाचा पुरवठा

प्रकरणात प्राथमिक माहितीनुसार, श्रीराम कॉम्प्लेक्स मधील एजन्सीने युरीमॅक्स डी टॅबलेटसची ऑर्डर दिल्लीला दिली होती. या एजन्सीला ऑर्डर प्लेस झाल्यानंतर बिहार येथील मार्स फार्मा पुनिया येथून मालाचा पुरवठा करण्यात आला आहे.