Chh. Sambhaji Nagar : बेकायदा मोबाइल टॉवरचा सुळसुळाट! ७१६ पैकी तब्बल ६५३ टॉवर अनधिकृत

छत्रपती संभाजीनगर - शहरात विविध मोबाइल कंपन्यांचे ७१६ टॉवर असून, यातील फक्त ६७ टॉवर नियमित आहेत तर ६५३ मोबाइल टॉवर अनधिकृत आहेत. त्यांच्याकडे ८२ कोटी ७७ लाखांचा कर थकला आहे. कर भरल्यानंतर अनधिकृत टॉवर नियमित केले जाणार आहेत. त्यासाठी ज्या इमारतीवर टॉवर उभारण्यात आले आहेत, त्या इमारती नियमित कराव्यात, अशी सूचना प्रशासक जी. श्रीकांत यांनी गुरुवारी (ता. १९) केली.

शहर परिसरात बेकायदा मोबाइल टॉवरचे जाळे उभे राहिले आहे. मोबाइल टॉवर लावताना महापालिकेची परवानगी घेणे आवश्यक आहे. मात्र, रात्री-अपरात्री मोबाइल कंपन्या टॉवर उभारत आहेत. त्यानंतर अशा टॉवरचा शोध घेऊन महापालिका कर आकारणी करते.

त्याला अनेक मोबाइल टॉवर कंपन्यांनी न्यायालयात आव्‍हान दिलेले आहे. महापालिकेच्या नोंदीनुसार शहरात ७१६ मोबाइल टॉवर आहेत. त्यापैकी फक्त ६७ जणांनी महापालिकेची परवानगी घेतलेली आहे. मोबाइल टॉवर कंपन्यांकडे ८२ कोटी ७७ लाख रुपयांचा कर थकलेला आहे. त्यामुळे गुरुवारी प्रशासक जी. श्रीकांत यांनी आढावा बैठक घेतली. मोबाइल टॉवर ज्या इमारतींवर उभारण्यात आले आहेत, त्या इमारती नियमित आहेत का? याची तपासणी करावी.

इमारती अनधिकृत असतील तर त्या नियमित करण्याची कार्यवाही करावी. त्यानंतर मोबाइल टॉवर नियमित करण्याची कार्यवाही करावी. मोबाइल टॉवर सील अथवा काढून घेण्याची कारवाई न करता त्यांना नियमित करून त्यांच्याकडील कर वसूल करावा, अशी सूचना जी. श्रीकांत यांनी केली. या निर्णयाची तातडीने अंमलबजावणी करण्याचे आदेश त्यांनी दिले.

‘नीचे दुकान, उपर मकान’साठी अग्निशमन यंत्रणा आवश्‍यक

शहराच्या अनेक भागात ‘निचे दुकान, उपर मकान’ अशी अवस्था आहे. अशा मालमत्तांना अग्निशमन विभागाची एनओसी घेणे बंधनकारक आहे. १५ मीटरपर्यंत उंचीच्या हॉस्पिटल, शाळा, व्यावसायिक इमारतींमध्ये आग आटोक्यात आणण्याचे उपकरण लावणे गरजेचे आहे; अन्यथा दंडात्मक कारवाई करावी. २४ मीटर उंचीपर्यंतच्या निवासी इमारतींना फायर एनओसीची आवश्यकता नाही, असे यावेळी प्रशासकांनी स्पष्ट केले.