Chh. Sambhaji Nagar : दौलताबाद घाटात वाहतूक ठप्प; प्रवाशांना मनस्ताप, वाहनांच्या चार किलोमीटरपर्यंत रांगा

दौलताबाद/खुलताबाद - दौलताबाद घाटा खालील ऐतिहासिक दरवाजात रविवारी (ता.८) वाहतूक ठप्प झाल्यामुळे महामार्ग ठप्प झाला होता. यामुळे घाटामार्गे प्रवास करणाऱ्या पर्यटकांसह भाविकांना मनस्ताप सहन करावा लागला. वाहनांच्या जवळपास ४ किलोमीटरपर्यंत रांगा लागल्या होत्या. दुपारी ३ वाजता ठप्प झालेली वाहतूक अखेर ५ वाजता सुरु झाली. मात्र, तोपर्यंत प्रवाशांना अडचणीचा सामना करावा लागला.

रविवार असल्यामुळे पर्यटकांसह भाविकांची मार्गावर जास्त वाहनांची गर्दी होती. दौलताबाद घाटात दुपारी तीन ते पाच वाजेच्या सुमारास वाहनांच्या वर्दळीमुळे रहदारी ठप्प झाली. याचा मनस्ताप मार्गावरुन प्रवास करणाऱ्यांना झाला. ही वाहतूक कोंडी ही कागजीपुरा गाव ते देवगिरी किल्ला प्रवेशद्वारापर्यंत अशी ४ किलोमीटर पर्यंत होती.

सध्या खुलताबाद येथील उरुस व शनिवार रविवारच्या सलग सुट्ट्या व शालेय सहलींचा हंगाम सुरू असल्यामुळे तसेच देश विदेशासह शहरातील विकेन्डला पर्यटनासाठी येणारे पर्यटक यांनी दौलताबाद, वेरूळ, खुलताबाद, म्हैसमाळ, पितळखोरा लेणी आदी पर्यटन स्थळांना भेटी देत आहेत. त्यामुळे मार्गावर मोठ्या प्रमाणात वर्दळ आहे. या दरवाजात जवळपास प्रत्येक रविवारी किंवा सुटीच्या दिवशी वाहतूक ठप्प होते. मात्र, याकडे कुणीही लक्ष देत नसल्याचा आरोप नागरिकांनी केला आहे.

संबंधित विभागाचा काणाडोळा

येथील वाहतूक कोंडीची समस्या मार्गी लावावी व पर्यायी रस्ता तत्काळ करावा असे छत्रपती संभाजी नगर खंडपीठाने सुमोटो याचिका दाखल करून घेत आदेशित केले आहे. परंतु प्रशासनाने अद्याप कुठलीही उपाय योजना केलेली आढळत नाही. यामुळे पर्यटक व भाविक यांनी संताप व्यक्त केला आहे. प्रशासनाने पर्यायी रस्त्याचे काम सुरु करावे अशी मागणी पर्यटक, भाविकांनी केली आहे.संबंधित विभागाचा काणाडोळा

येथील वाहतूक कोंडीची समस्या मार्गी लावावी व पर्यायी रस्ता तत्काळ करावा असे छत्रपती संभाजी नगर खंडपीठाने सुमोटो याचिका दाखल करून घेत आदेशित केले आहे. परंतु प्रशासनाने अद्याप कुठलीही उपाय योजना केलेली आढळत नाही. यामुळे पर्यटक व भाविक यांनी संताप व्यक्त केला आहे. प्रशासनाने पर्यायी रस्त्याचे काम सुरु करावे अशी मागणी पर्यटक, भाविकांनी केली आहे.