Chhatrapati Sambhajinagar : नोकरी धोक्यात येताच करांची वसुली दुप्पट!

छत्रपती संभाजीनगर - ‘मी तिकीट कलेक्टर म्हणून व जीएसटीमध्ये काम केले आहे, महापालिकेची तिजोरी कशी भरायची हे मला माहीत आहे’ असे प्रशासक जी. श्रीकांत यांनी सांगितले होते. त्यानुसार त्यांनी वसुलीकडे विशेष लक्ष देण्यास सुरवात केली असून, ज्यांच्याकडून वसुली होणार नाही, त्यांना थेट घरी बसविले जाईल, असा इशारा त्यांनी कर्मचाऱ्यांना दिला होता.

त्यामुळे नोकरी जाण्याच्या भीतीने कर्मचारी कामाला लागले आहेत. काही दिवसांपूर्वी महापालिकेची दररोजची मालमत्ता कर व पाणीपट्टीची वसुली ३० ते ४० लाख रुपये होत होती, सध्या हा आकडा ८० ते ९० लाखांवरपर्यंत जात आहे.

महापालिकेचे प्रशासक जी. श्रीकांत यांनी गेल्या आठवड्यात प्रभागनिहाय्य वसुली कर्मचाऱ्यांची बैठक घेतली. त्यात त्यांना ''वसुली वाढवा, अन्यथा तर थेट घरी जावे लागेल,’ असा इशारा दिला. प्रशासकांच्या इशाऱ्यामुळे कर्मचारी कामाला लागले आहेत.

यासंदर्भात जी. श्रीकांत यांनी सांगितले की, आढावा बैठकीत कर्मचाऱ्यांच्या अडचणी जाणून घेतल्या आणि दररोजच्या वसुलीवर माझे लक्ष राहील, असा सूचना केल्या. त्यामुळे पूर्वी प्रतिदिन ३० ते ४० लाख रुपये कर वसूल होत होती. आता प्रतिदिन ८० ते ९० लाख रुपयांची कर वसुली होत आहे.

कंत्राटदारांचे दिले १५ कोटी रुपये

महापालिकेकडे कंत्राटदारांचे सुमारे पावणे दोनशे कोटी रुपये थकले आहेत. दिवाळीच्या पार्श्‍वभूमीवर हे कंत्राटदारांवर महापालिकेत खेट्या मारत होते. त्यामुळे महापालिकेने दिवाळीत कंत्राटदारांचे १५ कोटी रुपये अदा केले आहेत.