Chh. Sambhajinagar Rain : अवघ्या २० मिनिटांत पडला १६.३ मिलीमीटर पाऊस

छत्रपती संभाजीनगर : शहरात शनिवारी (ता. २०) सायंकाळी सातच्या सुमारास वादळी वाऱ्यासह पाऊस झाला. दरम्यान, पावसापूर्वी सोसाट्याचा वारा सुटल्याने सगळीकडे धूळच धूळ दिसत होती. चालकांना आपली वाहने जागेवरच उभी करावी लागली. सायंकाळी सात ते साडेसातदरम्यान विजांच्या कडकडाटासह जोराचा पाऊस झाला. अवघ्या २० मिनिटांत १६.३ मिलिमीटर पावसाची नोंद झाली.

शहरात दिवसभर प्रचंड उकाडा होता. ढगाळ वातावरण असल्याने ऊन-सावलीचा खेळ सुरू होता. सायंकाळी पाचनंतर ढगांची गर्दी झाली. सायंकाळी सातच्या सुमारास २० मिनिटे पाऊस झाला.

सायंकाळी पाचच्या सुमारास वारा सुटला. पावणेसातला वाऱ्याने वेग पकडल्याने शहरात जिकडे-तिकडे धूळच धूळ दिसत होती. त्याचा त्रास वाहनधारकांना झाला. रस्त्यावरील कचरा, धूळ घरात घुसल्याने अनेकांची त्रेधातिरपीट उडाली.

वाऱ्याचा वेग २५ ते ३० नॉट्स

वेधशाळेच्या चिकलठाणा येथील कार्यालयाने दिलेल्या माहितीनुसार, १६.३ मिलिमीटर पावसाची नोंद झाली. यावेळी वाऱ्याचा वेग प्रतितास २५ ते ३० नॉट्स होता.